बर’ बिजों आरो बिमा रावनि फरायसालिफोराव दासिमबो गोबां फोरोंगिरिफोरनि आंखाल दं । सासे सानै फोरोंगिरिफोरजोंनो गोबां बर’बिजोंनि फरायसालिफोरा सोलिगासिनो दं जायनि थाखाय फरायसाफोरा गुन गोनां सोलोंथाइखौ नांगौ बादियै मोननो हायाखै । आसाम सोरखारा बर’ बिजोंनि फरायसालिफोराव फोरोंगिरि थिसनथाइ होनायाव गोहैलु दिन्थिगासिनो दं, जायनि थाखाय दुलाराय बर’ फरायसा आफादा फोरोंगिरि थिसन नांगौनि थाखाय आसाम सोरखारनि हेंथायै गोख्रों दाबि खालामदों होनना सुबनखाता दख’रा एबसुनि सनाथि माइथाइ फालिथाइ आरो सुबनखाता गुदि बर’ थुनलाइ आफादनि 51थि बोसोरसालिया जथुमायाव मिरु एबसुनि आफादगिरि दिपेन बर’आ गाहाइ आलासि महरै बाहागो लानानै बुंथियो । बेजों लोगोसेनो बिटिआर गोरोबथानि दफा बादियैनो बड’लेण्ड हालामनि सिमा बारायनाय आरो दानख’जानाय सोलिदों आरो थाबैनो आबुंङै महर होनो नांगोन, बेखौ लानानै रावबो गोरोन्थि बुजिलायनो नांङा होनना दुलाराय बर’ फरायसा आफादनि आफादगिरि दिपेन बर’आ बुंथियो ।
सुबनखाता दख’रा दुलाराय बर’ फरायसा आफादनि 50थि बोसोरसालिया जथुमा लोगोसेनो सनाथि माइथाइ फोरबो फालिथाइ आरो सुबनखाता गुदि बर’ थुनलाइ आफादनि खुंगा 51थि बोसोरसालिया जथुमानि हाबाफारिनि खुगा लाइसिखौ बिटिआरनि बुंथिगिरि कातिराम बर’आ बेखेनानै होयो । बेजों लोगोसेनो गेवलां मेलखौ बाक्सा जिल्ला एबसुनि आफादगिरि उमेश दैमारि बिथांआ बेखेवनानै बे ओन्सोलनि समाजारि जेंना, सोलोंथाइयारि बिथिंनि फारसे बिबुंथि होयो । बे हाबाफारिआवनो थांखिजानाय बुंथिगिरि महरै बर’ थुनलाइ आफादनि जिउनां सोद्रोमा चरत चन्द्र रामसियारि बिथांमोनजों लोगोसेनो गोबां मेलेमजिबि सोद्रोमाफोरा बाहागो लायो ।
