गोदान दिल्ली, 2 एप्रिल 2022: ब्रिटेइननि गाहाइ मन्थ्रि बरिस जनसनआ युक्रेननि हादरगिरि जेलेन्सकिजों मारिय’पलनिफ्राय सुबुंफोरखौ इउ एनआ रैखाथियै दिहुननो नाजानायखौ सावरायदों।ब्रिटिस सरकारनिफ्राय बावयैसो समाव फोसावनाय बिबुंथिनि बायदिब्ला ब्रिटेइनआ युक्रेननो रांखान्थि आरो सुबुंथिनि हेफाजाब होनो खोथा होदों। इउ एन बिबानगिरिया बुंदों, बे ओनसोलाव 1 लाख सुबुंफोरा थाबथानानै दं आरो बिसोरनाव जाग्रा आदारनि आंखाल जादों।बे ओनसोलाव जाग्रा आदार आरो मुलिफोरखौ जगायना होनायजों लोगोसे सुबुंफोरखौ रैखाथियै दिहुननो थाखाय दावहा दोनथ’नायखौ नेनानै थागासिनो। युक्रेन सरकारा बुंदों, आगुनि सभियेत संघनि समाव बानायनाय स्टील प्लान्टयाव दासिमबो 1 रोजा सुबुंफोरा थाबथानानै दं।जनसननि डाउनिं स्ट्रीट मावख’या बुंदों, युक्रेननि थागिबिफोरा गावसोरनि उदांस्रिनि थाखाय दावहा नांदों आरो बेयो युक्रेनखौ गोख्रों खालामनायजों लोगोसे रासियानि हादरगिरि ब्लादिमीर पुतिनखौ फेलें खालामनो थाखाय आगुनिफ्राय बांसिन नाजासिननाय। बेजों लोगोसेनो ब्रिटेइनआ युक्रेननो गोनांथि हाथियार दैथायहरनो थाखाय उफ्रा सान्थ्रिनि हेफाजाब होनायखौबो लाखिलांबाय थागोन होननानै बुंबावदों।
