करिमगन्ज, 4 एप्रिल 2022: करिमगन्जनि सुराइबिल ओनसोलनि आसाम-त्रिपुरा बर्डारनिफ्राय मंगलबारखालि आयेननि बेरेखायै फालांगि खालामनाय 50 लाख रांनि Cough Syrup बोखांनो हायो। पुलिसआ नायबिजिरनायनि गेजेरजों AS 01 MC 0386 नम्बरनि गंसे ट्राकआव Cough Syrup जों बुंफबनाय गासै 93 कार्टन बोखांनो हायो। बेयाव गासै 10,100 बथल Cough Syrup दंमोन। बेनिनो 27 कार्टनआव गासै 2,566 Phensedyl नि बथल आरो 66 कार्टुनआव गासै 7,590 Ascough नि बथल मोननाय जादों। मिथिनो मोननाय बादिब्ला, आयेननि बेरेखायै बे cough syrup खौ त्रिपुरासिम लानानै थांनाय जादोंमोन। ट्राक सालायग्रा आदित्या राभाखौ पुलिसआ हमबाय। बियो कामरुप जिल्ला नालापारानि थिगिबिमोन। पुलिसआ दा ट्राक सालायग्रानाव सोंथि सोंनायनि गेजेरजों नायबिजिरनाया सोलिगासिनो दं होनना मिथिनो मोननाय जादों।