गोदान दिल्ली, 12 आगष्ट, 2022: 75थि उदांस्रि सानखौ फालिनो हादराव गोबां थियारि खालामगासिनो दं । बे सानजों लोब्बा लाखिनानै हादरनि गुबुन गुबुन ओनसोलफोराव आजादी का अमृत महातस्वभनि गेजेरजों नख’र नख’र फिरफिला बिरहोनायनि थांखिजों सांग्रांथि रेलि खालामनायखौबो नुनो मोन्दों । हादरनि राजथावनि दिल्ली नोगोराव 75थि उदांस्रि सानखौ गाजा गोमजायै फालिनो जेरैबो लाहार-फाहार खालामगासिनो दं । बे खेबआव नरेन्द्र मडिआ दिल्लीनि लाल किल्लायाव खुंफुंनो गोनां हादर उदांस्रि सान फालिनायाव बाहागो लागोन । नरेन्द्र मडिआ बोसोरफ्रोमबो बुलेट प्रुफनि मदद गैयाजासे गावनि बिबुंथिखौ होबोदों । नाथाय बे खेबआव आलादा नुथाय नुनो मोनगोन नामा ? नरेन्द्र मडिनि सिगांआव गासैबो गाहाइ मन्थ्रिफोरानो बुलेट प्रुफ बक्स सिंआव थानानै बिबुंथिफोरखौ होबोदोंमोन । बे खेबआव नरेन्द्र मडिआबो बिबुंथि होनायाव बुलेट प्रुफनि हेफाजाब लागोन नामा ? थामहिनबा PTI नि खौरांआव मोनसे सावगारि नुनो मोन्दों, जेराव लाल किल्लायाव गंसे बुलेट प्रुफ बक्स बानायदों । बेखौ नोजोर होनानै गाहाइ मन्थ्रिखौ खुंफुंनो गोनां उदांस्रि सानाव बुलेट प्रुफ बक्सआव गसंनानै बिबुंथि होगोन होननानै आन्दाज खालामनाय जादों ।
