गोदान दिल्ली,3 मे 2022: इउक्रेननि हादतगिरि भलडिमिर जेलेनस्कीआ सुबुंफोर आरो राजखान्थि दैदेनगिरिफोरखौ सोमोनदो लानानै बुंदों रासिआनि सान्थ्रिफोरा इउक्रेननि 3,620 सुबुंफोर थानाय ओनसोलआव गाग्लोबदों। बेनि गेजेराव इउक्रेननि सान्थ्रिआ मोन 1,017 ओनसोलखौ दखल खालामनानै लाफिननो हाबाय। आद्रा थानाय 2,603 ओनसोलखौ दखल खालाम बावनांगौ दंबावयो।
आथिखालनि समाव इउक्रेननि 20 जौखोनदो ओनसोल एबा 125,000 बर्ग किलमिटार हा सा बाहागोखौ रासियाआ दखल खालामनानै लादों। हादतगिरि जेलेनस्कीआ बुंबावदों रासियाआ 8 बोसोर सिगां इउक्रेननि हेंथायै दावहा नांदोंमोन। 2014 माइथायनिफ्राय लानानै 24 फेब्रुवारि 2022 माइथायनि गेजेराव रासियाआ इउक्रेननि 43,000 स्कवेयार किलमिटार ओनसोलखौ दखल खालामनानै लादों।
गुबुन फारसेथिंजाय 3,00,000 स्कवेयार किलमिटार हा सा बाहागोआ दावहा जाबाय थानायनि जाहोनाव गाज्रि जाबाय। इउक्रेननि 12 मिलियन सुबुंफोरा न’ गैजायै जादों। दावहा जाबाय थानायनि जाहोनाव 5 मिलियन सुबुंफोरा हादतखौ नागारनानै थांबाय।जेराव आयजोफोर आरो गथ’फोरा बांसिन दं।
आमेरिकाआ इउक्रेननो एडबान्स गुन्द्रासा सिस्टिम आरो हाथियारखौ दैथाय हरनो बाथ्रा बुंदों।जायखौ लानानै रासियाआ रागा जोंखांदों। रासियाआ बुंदों आमेरिकानि बेबायदि हाबा मावनाया अराव गिहि लुनानै होनाय बायदि।रासियानि हेंथायै दावहा नांनायाव आमेरिकानिफ्राय इउक्रेननो मदद होनायनि बेयो 11 थि बाहागो।
आमेरिकानि गागि बिबानगिरिआ बुंदों हाइ मबिलिटी आर्टिलारी रकेट सिस्टिमखौ इउक्रेनयाव दैथाय हरनाय जागोन, जायखौ HIMARS होननानैबो मोनथिनो मोननाय जायो। बेनि उनाव रासियाआ सांग्रांथि होनानै बुंदों बेबायदि हाथियारखौ इउक्रेननो दैथाय हरनायजों आमेरिकाना थोंजों रासियाजों जुजिनायनि खैफोतआ बांगोन।
