गुवाहाटी, 5 मे 2022: मुलुगनां बाजाराव थावनि बेसेनआ मोनफ्रोम बेरेलआव खम जानायनि उनावबो भारतआव पेट्रल आरो डिजेलनि बेसेनआ मानो खमायाखै? बेखौ लानानै कंग्रेस दोलोआ गोख्रों खुद्रिखांनाय फोरमायदों। कंग्रेस दोलोनि राज्योयारि बुंथिगिरि दिलीप शर्माआ सावरायनानै बिजेपि दोलोनि दैदेन्नाय सरकारनि सायाव गोख्रों अजद खालामनानै ओरैबादि बुंदों, हादरनि गेजेराव पेट्रल-डिजेलनि अनगायैबो आंगोयै बाहायजाग्रा मुवा-बेसादफोरनि बेसेनआ बारायबाय थानायनि जाहोनाव सरासनस्रा सुबुंफोरा गोबां जेंनायाव गोग्लैदों।
कंग्रेसनि बुंथिगिरिया अजद खालामनानै बुंदों, थांनाय 27 एप्रिलनिफ्राय दासिम 95.69 डलारसिम खमायदों। फारसेथिं मुलुगनां बाजाराव गोथां थावनि बेसेनआ बारायनायनि थाखाय भारतआवबो थावनि बेसेनखौ बारायदों होन्नानै सरकारआ फोसावदों। नाथाय मुलुगनां बाजाराव गोथां थावनि बेसेनआ खमायनायनि उनावबो दासिम भारतआव मानो बेसेनआ खमायाखै होन्नानै कंग्रेसआ सोंथि खालामो। कंग्रेसनि बुंथिगिरिनि बादिब्ला, भारत सरकारआ 27 जौखोन्दो लानायनि अनगायैबो राज्यो सरकारनि भेट आरो डिलारनि कमिसन लागासिनो दं। जायनि थाखाय आसाम राज्योयाव पेट्रलनि बेसेनआ मोनफ्रोम लिटाराव 106 बांसिन रां जाहैदों। मिरुआव आथिखालनि सोलिबाय थानाय मडि सरकारखौ सावरायनानै कंग्रेसआ बुंबावदों, थांनाय कंग्रेस दोलोनि खुंथाय समावसो पेट्रल-डिजेलनि बेसेनआ जोबोद बाङाइमोन आरो आथिखालनि मडि सरकारनि समाव मुवा-बेसादनि बेसेनआ बारायबाय थानायजों सरासनस्रा सुबुंफोरा बायदिसिना जेंनाफोरजों बांसिनै बुगिनांदों होन्नानै बुङो।
