गोदान दिल्ली, 28 मे 2022: माहारियारि राजथावनि दिल्लीजों नांजाबनाय उत्तर प्रदेसनि गाजियाबादयाव पुलिसया थांनाय हराव मोननै आलादा आलादा जाथायाव सानै बान्था गोनां दुथांफोरखौ गावथारनो हादों। गावथार जानाय सानै दुथांफोरनि मुंखौ राकेश आरो बिल्लु एबा अबिनास होननानै फोरमायदों। सानैबो दुथांफोरा गौतमबुद्ध नगर जिल्लानि बादलपुर थाना ओनसोलनि सिङाव थानाय दुजाना गामिनि थागिबि।
सुलुंनि बायदिब्ला, गावलायनायनि गिबि जाथाया गाजियाबादनि मधुबन बापूधाम आरो नैथि जाथाया इन्दिरापुरम थाना ओनसोलाव जादों।मख’नो गोनांदि पुलिसआ सुलुंनिफ्राय स्रोद खौरां मोननायखौ बिथा खालामनानै मधुबन बापूधामयाव खैसार सानानै दुथां राकेसखौ बेंदिङो।
पुलिसया राकेसखौ सारेन्डार खालामनो थिनब्ला बियो पुलिसनि सायाव फायारिं खालामो।पुलिसयाबो फिनजाथाय होनानै फायारिं खालामफिनायाव राकेसया थैनो गानां जायो।दुथां राकेसनि सायाव 50 हाजार रां बान्था फोसावनाय दंमोन।राकेसखौ माखासे जेंना गोनां हाबा फारि मावनायावबो लोब्बा दं होननानैबो मोनथिनो मोननाय जादों।
गुबुन फारसेथिंजाय गाजियाबादनि इन्दिरापुरम थाना ओनसोलनि सिङाव थानाय गावलायनाय जाथायाव पुलिसया बिल्लु एबा अबिनासखौ गावथारनो हायो।बिल्लुनि सायाव 1 लाख रांनि बान्था फोसावनाय दंमोन।
