मध्य प्रदेश, 17 जुन, 2022: मध्य प्रदेशनि गुबुन गुबुन जायगाफोराव लामानि गिख्रंथाव जाब्रथाइ सोमजिदों। जेराव उन्दै गथ’साजों लोगोसे सा 14 सुबुंफोरा हरखाबै जिउ खहा जानाङो आरो सा 17 सुबुंफोरा गोब्राबै जोखोम जादों। जिउ गोमानाय सा 14 सुबुंफोरनि गेजेराव सा 2 उन्दै गथ’साफोरबो दंमोन। रिपर्टनि बादिब्ला, लामानि जाब्रथाइया मध्य प्रदेशनि चिन्डवारा आरो बरवानी जिल्लाजों लोगेसेनो बेटुल जिल्लायावबो हरसेयावनो खननै जाब्रथाइ जादों।
चिन्डवारा जिल्लायाव सासे उन्दै गथ’साजों लोगोसेनो सा 7 सुबुंफोरा जाब्रथाइजों जिउ खहा जादों आरो सा 5 सुबुंफोरा गाज्रियै जोखोम जायो । मिथिनो मोननाय बादिब्ला, बे सुबुंफोरा गंसे जीपजों हान्थिदोंमोन । कडामाव गामियाव हरखाबै हरगेजेरनि समाव बिसोर गाखोनाय जीप गारिया गंसे बाइकजों सौग्रावनानै खरसे दैखराव गलांदोंमोन । जोखोम जानाय सुबुंफोरखौ साखाथिनि देहा फाहामसालियाव थाबैनो फाहामथाइ होनो लांदों होनना सुलुंनि गेजेरजों मिथिनो मोन्दों । बे जाथाइयाव जिउ खहा जानाय सुबुंफोरनि मुङा फारियै- दिपु इभनटी, अजय इभनटी, सचीन, राजकुमार चावरे, सागर, रणजीत उइके आरो रामनाथ इभनटी।
मध्य प्रदेशनि गिबि मन्थ्रि शिभराज सिं चौहान आरो राइजो कंग्रेसनि आफादगिरि कमल नाथआ खौसेयै बे गिख्रंथाव जाब्रथाइजों जिउ खहा जानाय सुबुंफोरनि थाखाय सासेयाव 4 लाख रां आरो जोखोम जानाय सुबुंफोरनो 50,000 रां अनसुंथाइ होगोन होनना बुंथिदों।
बारवानी जिल्लायाव आरोबाव सासे उन्दै गथ’साजों लोगोसे सा 3 सुबुंफोरा जिउ खहा जानायजों लोगोसेनो सा 7 सुबुंआ जोखोम जायो। गंसे बास आरो गंसे ट्राकजों सौग्रावलायनायाव बे जाब्रथाइया हरगेजेरनि समाव जादों । खौरांनि गेजेरजों मिथिनो मोननाय बादिब्ला, बासनि टायारआ गाज्रि जानायाव सोलायनो थाखाय बासखौ लाखिनानै बास सालायग्राजों लोगोसे हेफाजाब होग्रा सुबुंआ टायारखौ सोलायनाय समावनो गंसे ट्राकआ सौग्रावफैयो जायनि जाहोनाव बासआव गाखोनाय दावबायारिफोरजों लोगोसे बास सालाग्रायाबो होसिनजायो।
बाग्गा दांगी, कमलेश मीना, आरो सासे 6 बोसोर बैसोनि उन्दै गथसायाबो बे जाब्रथाइजों जिउ खहा जानांदों । मिथिनो मोननाय बादिब्ला, बे बासआ भिलवारा, राजस्थानिफ्राय पुने फारसे थांगासिनो दंमोन । जोखोम जानाय सुबुंफोरखौ दा देहा फाहामसालियाव थिसननाय जाबाय।
बेटुल जिल्लायावबो साथाम सुबुंफोरा लामानि गिख्रंथाव जाब्रथाइजों जिउ गोमानो गोनां जादों । गंनै बाइकनि सौग्रावलायनायाव जिउ गोमानाय सुबुंफोरा फारियै- अंकित नागरे, साहिल आरो सानी होनना मिथिनो मोन्दों । साथामबो जिउ खहा सुबुंफोरा हेलमेट गानाखैमोन होनना सुलुंनि गेजेरजों मिथिनो मोनबावदों । बेटुल जिल्लायावनो आरोबाव गुबुन मोनसे जाब्रथाइ सोमजिबावदों जेराव गंसे डामफार गारि आरो गंसे बासआ सौग्रावलायो। बे जाथाइयाव दामपार सालायग्रा सुबुंआ गोब्राबै जोखोम जादोंमोन नाथाइ उनाव फाहामथाइ लाबाय थानाय समावनो बिनि जिउआ खहा जायो।
