गोदान दिल्ली, 5 मे 2022: भारतनि गाहाइ मन्थ्रि नरेन्द्र मडिआ इउरपनि दरथाम हादराव दावबायहैखांनायनि उनाव फिन गुबुन हादराव दावबायहैनायनि थांखि लाबावदों। मिथिनो मोन्नाय बादिब्ला, गाहाइ मन्थ्रि मडिआ सोलिफु मे दाननि फैगौ 16 अक्टआव नेपाल हादर दावबायहैगोन। बुंनो थाङोब्ला, गाहाइ मन्थ्रि नरेन्द्र मडिआ थांनाय 2019 माइथायाव गाहाइ मन्थ्रि महरै बिसायखजाफिन्नायनि उनाव गिबि खेब नेपाल हादराव दावबायहैगोन। फैगौ 16 मेआव दावबायनायनि थांखि लानाय हाबाफारि बादियै गाहाइ मन्थ्रि मडिआ नेपाल हादरनि बुद्ध पुर्निमा फोरबोयाव बाहागो लागोन। बेनि अनगायैबो गाहाइ मन्थ्रिआ गौतम बुद्धनि जोनोम जायगा लुमबिनियावबो दावबायहैगोन। दिनै नेपालनि गाहाइ मन्थ्रिनि प्रेस एडभाइजार अनिल पारियारआ बे बाथ्राखौ मिथिहोयो।
भारतनि गाहाइ मन्थ्रि नरेन्द्र मडिआ गावनि दावबायहैनाय समाव नेपालनि गाहाइ मन्थ्रि सेर बाहादुर देउबाजों दरनै हादरनि गुबुन गुबुन गोनां आयदाफोरनि सायाव सावरायगोन। नेपालनि गाहाइ मन्थ्रि देउबाआ थांनाय दानआव गोदान दिल्लीयाव दावबायफैखांबाय। बिथांआ बे खेबनि नेपालआव भारतनि गाहाइ मन्थ्रि दावबायहैगोनखौ भारत-नेपालनि थाखाय जोबोद गोनांथार होन्नानैबो फोरमायदों।
