अन्ध्र प्रदेश, 30 जुलाइ, 2022: लैथोमानि रुगुंआव बिसिजों गावसोरनि नैथि जुलिनि बोसोरारिखौ फालिनो थांदोंमोन श्रीनिबास राव मुंनि सासे हौवाया । लैथोमानि रुगुंआव बिसिजों लासै-लासै थाबायनानै थांबाय थानाय समावनो हरखाब गोमायो गावनि अनजालि बिसि साइप्रियाआ । बिनि उनाव हालाय-हाफाय थासारियाव गोग्लैयो फिसाइ श्रीनिबासआ । लोगो-लोगो गावनि बिसिनि गोमानायनि सायाव पुलिसनो खौरां होनाय बादियै पुलिसआ आइजोखौ लैथोमानि साखाथि ओनसोलफोराव सान-हर नागिरनो हमो । जाहोनाव साननै नागिरनायनि गेजेरजोंबो आइजोखौ दिहुननो हायाखिसै पुलिसआ । अदेबानि, फिसाइ श्रीनिबासआ गावनि बिसिखौ नागिरनो थाखाय गुबुन मोनसे हेफाजाब लाबावो । फिसाइ श्रीनिबासजों लोगोसे पुलिसआ अख्रां सान्थ्रिनि हेफाजाब लानानै आइजोखौ हेलिकप्टारजों नागिरो आरो गासै 1 कौटिनिबो बांसिन रां खरसा थांनायनि गेजेरावबो बिसिनि मोखांखौ नुमारासै फिसाइ श्रीनिबासआ । बेनि उनाव नागिरनाया गोबां सम बारलांनायनि उनाव गुबुन मोनसे सल’आ सोरांआव फैयो । बबेखानि फिसाइया आलाय-सिलाय थासारिजों हेलिकप्टार लालायनानै नागिरबाय थानाय समावनो बिसिआ गावनि असे बिमानो हवाट्स एपआव मेसेज दैथायहरो, जेराव नेल्लरसिम खारनानै गावनि गुबुन मोजां मोननाय हौवानि गोरबो बिखायाव आस्रय लाहैनाय बाथ्राखौ बिमानो फोरमाय हरो । आइजोनि बिमाया फोरमायनाय बादिब्ला, RK BEACH निफ्राय गुबुन सासे मोजां मोननाय हौवा रबीजों खारनानै रेलनि हेफाजाबआव नेल्लरसिम फैदों ।
गुबै बाथ्राया बेसोदि, अन्ध्र प्रदेशनि श्रिकाकुलामनि थागिबि मुंआ श्रीनिबास राव । बिथांआ 21 बोसोर बैसोनि साइप्रिया मुंनि सासे आइजोखौ जुलि खालामनायनि उनाव बिसोर सानैआ गावसोरनि नैथि जुलिनि बोसोरारि सानखौ फालिनो बिसाकापट्टनमनि RK BEACH सिम थांदोंमोन । बेनि सिगां बिसि-फिसाइ सानैबो गंसे मन्दिरआव गोजोन संसारनि थाखाय फुजाबो होदोंमोन आरो बेनि उनाव लैथोमानि रुगुंआव रंजानो थाङो । नाथाय बे समावनो श्रीनिबासआ गुबुन सासेनिफ्राय फन फैनायलाय रायज्लायनानै आइजोनि साखाथिनिफ्राय एसे दोरोदो । बे समाव बिसिआ गावनि मबाइलआव सावगारि सेबखांनाय एबा सेलफि लागासिनो दंमोन । दान्दिसे समनि उनाव जेब्ला फिसाइ श्रीनिबासआ जायगायाव फैफिनो अब्ला बिसिखौ नुनो मोनैयाव थाबैनो पुलिसनो खौरां हरो आरो गोबां जायगायाव हेलिकप्टारनि हेफाजाबजों नागिरसेयावबो श्रीनिबास रावआ गावनि आंगो बिसिखौ मोनमारासै आरो जोबथायाव साइप्रिया मुंनि आइजोआ गुबुननि जाहैयो ।
