गोदान दिल्ली,6 जुन 2022: नाइजीरियाआव गंसे गिरजा न’आव सिनाय मोनयै दुथांफोरा गुलि गावग्लुङो, जेराव सा 50 सुबुंफोरनि जिउया खहा जादों।बे गुलिखौ सोर आरो मा थांखिजों गावग्लुंदों, बेनि सोमोनदै दासिमबो मोनथिनो मोननाय जायाखै। पुलिसआ बे जाथायखौ नायबिजिरगासिनो दं।
नाइजीरियाआनि रैखाथि सान्थ्रिफोराबो बे जाथाय सोमोनदै दासिमबो जेबो फोरमायाखै। रिपर्टनि बायदिब्ला, नाइजीरियानि अभ सहराव थानाय सेन्ट फ्रान्सिस चार्सआव माखासे हाथियार लाग्रा सुबुंफोरा हरखाबै हाबफैनानै गुलि गावग्लुङो आरो थरसे बमखौबो बेरफ्रु होयो। जाय समाव बे जाथाया जादों ,बे समाव चार्सआव गोबां सुबुंफोरा थुबुर जादोंमोन। मानोना सुबुंफोरा चार्साव पेन्टेकस्ट सान्डेनि फोरबोखौ फालिनो थाखाय थुबुर जादोंमोन। चार्सआव गुलि गावलायनाय सोदोब खोनानाय लोगो लोगोनो सुबुंफोरा खारसादला जोबयो। बे गुलि गावलायनाय जाथायाव जिउ गोमानाय सुबुंफोरनि गेजेराव माखासे गथ’फोराबो दंफा देरो। जेराव माखासे सुबुंफोराबो जोखोम जादों। बे जाथायखौ लानानै जायगानि सुबुंफोरा रागा जोंखांदों। सुबुंफोरा बुंदो दाय गोयै सुबुंफोरखौ बुथारदों। पुलिसआ बे जाथायनि सोमोनदै दासिमबो जेबो फोरमान मोननो हायाखै। अभ सहरनि दैदेनगिरिआ बुंदों दासिमनि जारिमिनआव बेबायदि गिख्रंथाव जाथाया जाफेराखै।
