आसाम, 17 जुन, 2022: थारैनो जोबोद दुखुनांथाव। आसामाव जुब-जुब अखा हाबाय थानायनि जाहोनाव गुबुन गुबुन दैमाफोरा उसिफावनानै थागिबि सुबुंफोरा दैबानानि गिख्रंथाव जेंनाजों बुगिनो गोनां जादों । थाद’नाय गैयै अखा हानायनि जाहोनाव सुबुंफोरनि धोन-सम्पथि सिलिंखार जानायजों लोगोसेनो थानाय-जानायावबो गोबां जेंना नुजाथिदों। गोबां सुबुंफोरा न’आव दै लोमसावजोबनायनि थाखायनो गाव-गावनि न’खौ गारनानै रिलिप केम्पआव थाहैनो गोनां जादों ।

आसामाव दैबानानि जेंनाजों बुगिनांनाय सुबुंफोरखौ मदद होनो थाखाय गोसो अनफावरि, बलिउडनि मुंदांखा फावखुंगुर अर्जुन कापुर आरो दिथागिरि रहित शेट्टीआ CM Relief Fund आव 5 लाख रां अनसुंथाइ हरदों ।

‘बलिउडनि फावखुंगुर श्री अर्जुन कापुर आरो दिथागिरि रहित शेट्टीआ दैबानानि जेंनायाव गोग्लैनाय सुबुंफोरनि थाखाय गावसोरनि आखाइनिफ्राय गिबि मन्थ्रि रिलिप पानआव 5 लाख रां हरदों । बिसोरनि बे अनसुंथाइ हरनायाव आं बिसोरनिसिम गोसो-गोरबोजों गोजोननाय बावहरो’ होननानै हिमन्त बिस्व सर्माया टुइटारनि गेजेरजों बुंदों ।

अदेबानि आसामनि गासै 25 जिल्लाफोरनिफ्राय गासै 11.09 लाख सुबुंफोरा दैबानानि गिख्रंथाव जेंनायाव बुगिनानै दं । मानास, फाग्लाडिया, फुटिमारी, कपिलि आरो ब्रह्मपुत्र दैमाफोरा गोब्राब अखा हानायनि जाहोनाव उसिफावनानै खाथि-खालानि ओनसोलफोरा खैफोद गोनां जादों । मिथिनो मोननाय बादिब्ला, गासै 72 रेभिनिउ सार्कलनि सिङाव थानाय गं 1,510 गामिफोरा दैजों लोमसावजादों ।