गवाहाटी, 17 जुन, 2022: आसामनि डिब्रुगड़ जिल्लाआव ओनसोलाव थानाय गासै रायजो राजाफोरनि गोजोन आरो सान्तिनि थाखाय जिल्ला बेंगिरिआ Cr.PC नि Section 144 खौ फोसावनानै होदों। मिथिनो मोन्नाय बायदिब्ला थांनाय 15 जुननिफ्रायनो बे आयेनखौ जिल्लानि सिङाव गासैबो रोखोमनि हिंसायारि आरो आयेननि बेरेखा हाबा मावनायखौ होबथानो थाखाय फोसावनानै होदों। जाय सुबुङा बे आयेनखौ सिफायगोन बिनि हेंथायै IPC नि Section 188 नि गेजेरजों साजा होनाय जागोन होन्नानैबो मिथिनो मोन्दों। बे आयेनखौ डिब्रुगड़ जिल्लानि जिल्ला बेंगिरि बिस्वजित पेगुआ फोसावनानै होदों। गासै 60 साननि थाखाय बे होबथानाय आयेनखौ फोसावनाय जादों।
जिल्ला बेंगिरिआ फोरमायनाय बायदिब्ला, जिल्लानि सिङाव माखासे गोबां जाहोनखौ लानानै आयेननि बेरेखा हाबा मावनाया सोलिगासिनो दङ बेखौ होबथानो आरो रायजो राजाफोरनि गोजोन आरो सान्तनि थाखाय आयेनखौ फोसावनानै होदों। बे आयेननि गेजेरजों सा 5 सुबुंनि बांसिन रायजोनि थावनियाव खुंथाइनि गनायथि गैयालासे जथुमनाय, हान्जा सुरनाय आरो हेंथा खालामनाय हाबाफोरखौ बन्द’ खालामनानै होदों। बेनि अनगायैबो थुंग्रि लानानै बेरायनाय, सिलाइ आरो जेखि जाया बेरफुग्रा मुवा लानानै बेरायनाय आरो गासै आयेननि बेरेखा खामानिफोरखौ होबथानाय जादों।
