बरपेटा, 28 जुलाइ 2022: बरपेटा र’डनि शिमलागुरिआव मोनसे गिथावना बाइकनि सौग्रावनाय जाथाय नुजाथिदों। सानै आइजोनि आखायनिफ्राय हरखाब सेख’नानै रांनि थफ्लाखौ लानानै खारनाय समावनो सिखावआ सौग्रावनाय जाथायाव जिउ गोमादों। बे जाथायाव गुबुन सासे सिखावआबो गोब्राब जोखोम जायो। जायगानि सुलुंनिफ्राय मिथिनो मोन्नाय बादिब्ला, आइजोनि रां थफ्लाखौ लानानै खारनो नाजानाय समनि गेजेरावनो सिखावआ मोब्लिब खुन्थायाव सौग्रावो। बे जाथायाव जायगायावनो जिउ खहा जानाय सिखावनि मुंखौ बिहार किशानगन्जनि आमिर गवाला होन्नानै मिथिनाय जादों। फारसेथिं, जाथायाव जोखोम जानाय गुबुन सासे सिखाव रहित सिंखौ दासान्दि बरपेटा मिडिकेल देहा फाहामसालियाव देहा फाहामथाय होगासिनो दं।

मखनो गोनांदि, शिमलागुरि पुलिस सकिनि सिङाव थानाय कलबारि गामिनि सानै आइजोआ बरपेटा र’डनि बेंक अफ इन्डियानिफ्राय सेल्फ हेल्फ ग्रुपनि गासै 50 रोजा रांखौ दिहुन्नानै इ-रिक्साजों गावसोरनि न’ फारसे थांफिनबाय थानाय समावनो AS-01-EJ-9881 नम्बरनि गंसे बाइकजों हरखाब फैनानै सिखावआ रांनि थफ्लाखौ सिख’नानै गोख्रै बाइकजों थांबाय थानाय समावनो मोब्लिब खुन्थियाव सौग्रावो। बे जाथायनि उनाव सानै आइजोआ फोरमायनाय बादिब्ला, बेंकनिफ्राय दिहुन्नाय रांखौ बेगआव लादों सान्नानै सिखावआ हरखाब सिख’योब्लाबो नाथाय 50 रोजा रांआ बेगआव गैयामोन। मानोना, बेबायदि जानो हागौनि सन्देह’जों रांखौ रुमालआव मेरायनानै लोगोसेयै लाफादोंमोन।