Home Blog Page 93

नेपालनि दावबायारि बिरखं गोमानायखौ थेर-बेथेर थासारियाव मोनबाय।

By
BODOLAND रादाब
-
0
Nepal Missing Flight Found

(बिरखंआव सा 4 भारतारिजों लोगोसे सा 22 सुबुंफोर दंमोन)

काठमान्डु, 30 मे, 2022: नेपालआव मैया फुंनि समाव हरखाब गोमानाय दावबायारि बिरखंखौ संदान्नो हाबाय। नेपालनि सान्थ्रिआ मैयानिफ्रायनो गोमानाय बिरखंखौ नागिरबाय थानानै दिनै बिरखंनि गोग्लैनाय जायगाखौ संदान्नो हाबाय होन्नानै नेपाल सान्थ्रिनि बुंथिगिरिया टिउटारनि गेजेरजों फोरमायदों। सुलुंनि बादिब्ला, जायगानि सुबुंफोरनि हेफाजाबजों नेपालनि सान्थ्रिआ गोमानाय बिरखंनि गोग्लैनाय जायगाखौ मिथिनो हायो। सुलुंआ फोरमायबावदों, नेपालनि तारा मुंनि बिरखंआ हिमालयनि बरफ गिसिखानायनि जाहोनाव लामचे दैमानि साखाथियाव थानाय मस्तांग जिल्लानि कवांग गामियाव गोग्लैनानै थेर-बेथेर जादों। फारसेथिं, जायगानि सुबुंफोरा मिथिहोनाय बादिब्ला, लामचे दैमानि साखाथियाव मोनसे गिदिर बेरफ्रुनाय सोदोबखौ खोनानो मोन्दोंमोन। रायखांनो गोनांदि, सा 4 भारतारिफोरजों लोगोसे सा 22 सुबुंफोर गाखोनाय नेपालनि तारा बिरखंआ 9 NAET डाबल इन्जिन थानाय बिरखं। बिरखं गाथोननि बिबानगिरिया बुंदों, मैया रबिबारखालि 9 रिंगा 55 मिनिटआव पकरानिफ्राय जोमसोम फारसे सा 22 दावबायारिफोरखौ लानानै थांबाय थानाय समावनो हरखाब बिरखंजों फोनांजाब राहाआ बन्द’ जायो। बिबानगिरिया बुंबावदों, हिमालय हाजोनि बरफ गिसिखानायनि जाहोनावनो बे दुखुनांथाव जाथाया जादों । नाथाय बे जाथायाव साबैसे सुबुंफोरा जिउ गोमादों, बेनि सायाव दासिम नेपालनि बिबानगिरि सुलुङा फोरमायाखै। मानोना, रैखाथि खालामग्रा हान्जाया दासिम जाथायथिलियाव सहैनानै उदां खालामनाय खामानिखौ जागायजेन्दों होन्नानै सुलुंनिफ्राय मिथिनो मोन्दों।

पुलिसनि गुलि गावनायाव जिनाहारि खालामग्राया जोखोम जादों।

By
BODOLAND रादाब
-
0
Rapist Iqbal Hussain Shot by Police

गोदान दिल्ली,30 मे 2022: सासे बैसो जायै हिनजावसा गथ’खौ स्कुलनिफ्राय न’ फारसे थांबाय थानाय समावनो इकबाल हुसेन मुंनि सुबुङा जिनाहारि खालामदों। जायनि जाहोनाव जायगानि सुबुंफोरा जिनाहारि खालामग्रा दायनिगिरि इकबाल हुसेनखौ हमनानै पुलिसनि आखायाव गथायो। पुलिसआ जिनाहारि खालामग्रा दायनिगिरि इकबाल हुसेनखौ मेडिकेल आनजाद नायनो थाखाय डिपु मेडिकेल कलेजयाव लानानै थांङो। बे समावनो सिरि सिरियै पुलिसनि आखायनिफ्राय दायनिगिरिआ खारखोमा लाङो।

नाथाय पुलिसआ सं दाननायनि गेजेरजों कार्बि आंलं जिल्लानि डिफुनि नहरबारियाव जिनाहारि खालामग्रा
दायनिगिरिखौ गुलि गावयो। पुलिसनि गुलि गावनायाव आग्दा आखाइयाव गुलि नांजानानै दायनिगिरिआ जोखोम जायो। गुबुन
फारसेथिंजाय दायनिगिरिया खारखोमानाय जाथायखौ मोनथिनानै जायगानि सुबुंफोरा धर्ना होनानै बुंदों पुलिसनि सांग्रांथि
गोयैनि जाहोनावनो दायनिगिरिआ खारखोमानो हादों। पुलिस बिबानगिरिआ बुंदों मा थासारियाव दायनिगिरिआ पुलिसनि
आखायनिफ्राय खारखोमाया, बेनि फारसे नायबिजिरनाया सोलिगासिनो दं। आथिखालाव जोखोम जानाय दायनिगिरिखौ डिपु
मेडिकेल कलेजआव थिसननानै फाहामथाय होनाया सोलिगासिनो दं होननानै मोनथिनो मोननाय जादों।

Batadrava जाथाइनि गसरनि दसि होजानाय Ashiqul Islam आ लामानि जाब्रबथाइजों जिउ गोमाबाय।

By
BODOLAND रादाब
-
0
SP Leena Doley

गुवाहाटी, 30 मे, 2022: Batadrava जाथाइनि दसि होजानाय Ashiqul Islam आ लामानि जाब्रबथाइजों जिउ गोमाबाय होनना मिथिनो मोन्दों। थांनाय रबिबारनि मोनानि समाव आसामनि नगाव जिल्लानि रायदाङिया ओनसोलाव जाब्रबथाइ जानानै जिउ गोमायो। नगाव जिल्लानि पुलिस बेंगिरि Leena Doley आ खौरांगिरिनि सिगाङाव बुथिदोंदि जेब्ला दाय होजानाय सुबुङा पुलिसनि बेन्दोंनिफ्राय खारखुमानो नाजादोंमोन बे समावनो बे जाथाइया जायो। पुलिसनि खारबाय थानाय गारिनिफ्राय बारज्रुमनानै खारनो नागिरनायनि जाहोनाव गुबुन गंसे गारिया गारिखौ हमथानो हास्लाबैयाव सौनानै होनायाव दाय होजानाय सुबुंनि जिउआ गोमानो गोनां जायो। मिथिनो मोननाय बायदिब्ला, बे जाथाइ जानायनि सानसे सिगां Ashiqul Islam आ पुलिस बिफाननि सेराव गावखौनो गथाइ फैदोंमोन। बेनि उनाव पुलिसा बेखौ गावसिनि बेंथेयाव लायो। नगावनि पुलिस बिफाननि नायदिंगिरिआ फोरमायदोंदि दाय होजानाय सुबुंनि न’निफ्राय गंसे 7.62 mm पिस्तल, गंसे .22 पिस्टल आरो 7 राउन्ट गोथां गुलिखौ न’निफ्राय बोखांनो मोन्दों।

पुलिस बिफाननि सोंथियाव Ashiqul Islam आ गावनि न’आव बोखांनो मोननाय आयेन बेरेखा हाथियारखौ दोन्दोंमोन होननानै सिमान लायो। बेनि उनाव पुलिस बिफाननि मोनसे हान्जाया न’आव थांनानै नायबिजिर हैनायनि गेजेरजों आयेन बेरेखायै दोननाय हाथियार आरो गंसे मबाइलखौ बोखांनो हायो। बेनि अनगायैबो Batadrava जाथाइनि समाव गाननाय red t-shirt खौबो बोखांनो हायो। बेनि उनाव जेब्ला Ashiqul Islam खौ न’निफ्राय पुलिस थानायाव लाबोदोंमोन बे समावनो बियो लामायाव पुलिसनि आखायनिफ्राय खारखुमानो थाखाय गारिनिफ्राय बारज्रुमनानै खारनो नाजादोंमोन बेयावनो गारिजों सौजानानै जिउ गोमानो गोनां जायो। जाब्रबथाइ जानायनि उनाव थाबैनो देहा फाहामसालिआव फाहामथाइ होनो देहा फाहामसालिआव लानानै थांदोंमोन नाथाइ देहा फाहामगिरिया थैबाय होननानै फोसावनानै होयो। SP Doley आ फोरमाय बावदोंदि बे जाब्रबथाइनि जाहोनाव पुलिस बिफाननि सा 3 मावसुमाफोराबो जख’म जायो। फारियै सासे SI, गारि सालायगिरि आरो home guard आ जख’म जायो। बे समाव नगावनि Batadrava arson incident केसजों सोमोन्दो थानाय गासै सा 11 दाय होजानाय सुबुंखौ हमनो मोनबाय होननानै मिथिहोबावदों SP Doley आ।

मुलुकनि बयनिख्रुइबो देरसिन Whisky Bottle आ निलाम जाबाय।

By
BODOLAND रादाब
-
0
world largest whishky bottle

गोदान दिल्ली,30 मे 2022: ब्रिटेइनयाव मुलुकनि बयनिख्रुइबो देरसिन Whisky Bottle आ निलाम जाबाय।

बे बतला 5 फुट 11 इन्चि गोलाव आरो बेवहाय 311 लिटार Whisky सोनाय दंमोन। बे निलामिखौ लियन आरो टार्नबुल
कम्पानिया अनलाइन होदों। अनलाइन निलामाव Whisky Bottle खौ 1.4 मिलियन डलाराव फाननो हादों।

निलाम खालामग्रा कम्पानिआ बुंदों Whisky Bottle खौ “दा इन्ट्रेपिड” मुं दोननाय जादों। बेयो 32 बोसोर
गोजाम। बेखौ 1989 माइथायाव स्पाइसाइडनि मेकलनयाव डिस्टिल्ड खालामनाय जादोंमोन।बे Whisky Bottle खौ 2021 माइथायनि सेप्तेम्बर दानाव गिनीज वार्ल्ड रिकर्डयावबो मुं थिसननाय जादोंमोन।बे बटलाव गं 444 Whisky Bottleनि समान जौ दं होननानै दाबि दैखांनाय जादों।

बे Whisky Bottle खौ Fah Mai Holdings Group Inc आरो Rosvin Holdings Plc आ जुथायै बानायदों आरो बेखौ हान्टली,स्कटलेन्ड ,इउ. के .याव दिन्थिनाय जादों।“दा इन्ट्रेपिड”खौ Fah Mai आरो Rosvin Holdings नि डेनियेल मंकआ गावनि बिफा केप्टेन स्टेनली मंकखौ गोसोखांनायनि मुङाव बानायदोंमोन।

निलामी खालामग्रा कम्पानि लियन एन्ड टार्बुनाला बुंदों बे Whisky आ सना बायदि आरो बेनि स्वादआ आपेल फिथाय बायदि गोदै।डेनियेल मंकआ बुंदों आं आरो आंनि टीमनि थाखाय बेयो जेब्लाबो फैसानिफ्राय बेसेन गोसासिन जादों आरो गावनि बिफानि जोनोम सानाव बेखौ निलाम खालामनाय जादों।

गसाइगावनि आसाम-बंग सिमायाव पुलिसआ सुरांनि मा 9 मोसौ, मा 25 मोसौफोरखौ हमदों।

By
BODOLAND रादाब
-
0
llegal Cow Trafficking Caught

गसाइगाव, 30 मे, 2022: आफां आसामनि क’क्राझार जिल्लानि सिङाव थानाय गसाइगाव महकुमानि श्रीरामपुरजों नांजाबनाय आसाम-बंगनि सिमायाव पुलिसआ सुरांनि आयेन बेरेखायै लाबोनाय मा 9 मोसौजों लोगोसेनो मा 25 मौसोफोरखौ हमनो मोन्दों। पुलिसआ सिमा ओनसोलाव आयेन बेरेखा फालांगिनि हेंथायै जेसेबांनो गोख्रों नोजोर लाखिदों, बेबायदि समावनो सुरांफोरा सान आरो हरनि निजोम समाव खाबु लानानै आयेन बेरेखा फालांगि खालामनायखौ दासान्दि मिथिनो मोनबाय थादों। दिनैबो गसाइगावनि सापकाटा पुलिसआ संदान्नायनि गेजेरजों जाथोसे जौगाखां मा 9 मोसौफोरखौ हमनो हाबावो। मखनो गोनांदि, पुलिसनि नोजोरखौ आनज्रायनानै आयेन बेरेखा मोसौ फालांगि खालामनो नाजानाय सुरांनिफ्राय हरनि समावनो पुलिसआ मोसौफोरखौ हमनो हायो। सापकाटा पुलिस बिबानगिरिआ फोरमायनाय बादिब्ला, हरनि समाव सुरांफोरा थकसागुरिनि हाग्रायाव मोसौफोरखौ दोनखुमानो नाजादोंमोनब्लाबो नाथाय संदान्नायनि गेजेरजों मा 9 मोसौफोरखौ सुरांनिफ्राय उदां खालामनो हायो। नाथाय पुलिसनि संदान्नायखौ खौरां मोन्नानै सुरांआ गुबुन जायगायाव आनज्रायो।

गुबुन फारसेथिं, सानसेनि गेजेरावनो गुबुन राज्योनिफ्राय लाबोनाय मा 25 मौसोफोरखौ आसाम-बंग सिमानि श्रीरामपुरनिफ्राय हमनो हाबावदों। हरनि समाव पुलिसआ संदान्नानै UP 21/AN 3194 नम्बरनि गंसे ट्राकनिफ्राय मा 25 मौसोफोरखौ बोखांनो हायो। बेफोर मौसोफोरखौ माहारियारि राजा लामायाव पुलिसआ हरखाब संदान्नाय समाव ट्राकनिफ्राय बोखांनो हानायाव जाफुंसारदों।

मिज’राम पुलिसआ आसामनि काछारआव उन्दै लांखारग्रा दायनिगिरि हमदों।

By
BODOLAND रादाब
-
0
Mizoram police caught child kidnapper

गुवाहाटी, 28 मे, 2022: आथिखालाव सुबुं लांखारनाय जाथाइया बारानिफ्राय बारा जाबोगासिनो दं। बेबादिनो मिज’राम पुलिसआ आसामनि काछार ओनसोलनिफ्राय बृहस्पतीबारखालि सासे उन्दै गथ’ लांखारग्रा दायनिगिरिखौ हमनो हायो। मिथिनो मोननाय बादिब्ला, लांखारजानाय उन्दै गथ’साया 3 बोसोर बैसोनिल’मोन। हमजानाय दायनिगिरिखौ काछार जिल्लानि थागिबि फाइरुल हाख होननानै सिनायनो हादों।

सुलुंनि गेजेरजों मिथिनो मोननाय बादिब्ला, काछार जिल्लानि बाघा मुंनि जायगानि थागिबि सासे आइजोखौ बुनानै गंसे कारनिफ्राय नारख्लायनानै मिज’रामआव गालांदोंमोन। बे खामानिखौ फाइरुल हाखजों लोगोसे सा 2 गुबुन दायनिगिरिआ मावदों होननानै मिथिनो मोन्दों। बेसोर सा 3 दायनिगिरिफोरा आइजोनिफ्राय उन्दै गथ’साखौ लांखारनायजों लोगोसे 1.5 लाख रांखौ लानानै खारदों।

जाथाइनि खौरां मोननाय लोगो लोगोनो मिजराम पुलिसआ गोख्रों नायबिजिरनाय हाबाफारिखौ जागायजेनो आरो जाथाइयाव बाहायनाय कारखौ लुंलि जिल्लानि टिंपाल गामिनि 5 किलमिटार गोजानाव मोननो हायो। बेनि उनाव मिज’राम आरो काछार जिल्लानि गासैबो पुलिस स्टेसनआव सांग्रांथि हरनायजों लोगोसे नायबिजिरनायनि गेजेरजों फाइरुल हाखखौ काछार जिल्लायाव हमनो हायो। लांखारजानाय उन्दै गथ’खौबो मोनफिननो हाबाय होनना खौरां मोननाय जादों। अदेबानि बे लांखारनाय खामानियाव आखाइ गोनां आरोबाव सानै दायनिगिरिखौ संदानानै दिहुननो नाजागासिनो दं।

आसामनि डुलियाजानआव अर खामनानै गासै गं 8 दखाना खहा जादों।

By
BODOLAND रादाब
-
0
Duliajan Fire Accident

गुवाहाटी 28 मे, 2022: आसामनि डुलियाजानआव गिख्रंथाव अर खामनाय जाथाइ सोमजिदों। बे अर खामनाय जाथाइनि जाहोनाव गासै गं 8 गलाया खामनानै सेव हांगार जायो। ओनसोलनि सुबुंफोरा बे गिख्रंथाव जाथाइखौ मोब्लिब नांनानै जादों होननानै सन्देह’ खालामदों। मानि थाखाय बे जाथाइया सोमजिदों बेखौ दासिम्बो मिथिनो मोननाय जायाखै।

थांनाय सक्रुबारखालि मोनानि समाव बे जाथाइया सोमजियो। आसामनि डिब्रुगड़ जिल्लानि सिङाव थानाय डुलियाजाननि कुमद नगड़ होननाय गामियाव बे जाथाइया सोमजिदों। बे जाथाइखौ मिथिनो मोननानै खाथिनि पुलिस बिफाना जाथाइ जानाय जायगायाव थांनानै अर खामनायखौ नायजिर हैयो।

बेनि अनगायैबो Oil India Limited (OIL) नि गं 3 अर खोमोरग्रा गारिया थांनानै अरखौ खोमोर हैयो। 1 घन्टा नारा नाथा नाजानायनि उनाव अरखौ खोमोरनो हायो। मिथिनो मोननाय बायदिब्ला अर खोमोरग्रा बिफाना थाबैनो नाजानानै अरखौ खोमोरनानै गुबुन फालांगिनि न’फोरखौबो खामनायनिफ्राय रैखाथि खालामो। बेराफारसेथिङै, अर खामनायनि जाहोनाव गोबां लाक रांनि धोन आरो सम्पथिफोरा खहा जादों नाथाइ बे जाथाइनि जाहोनाव सासेबो सुबुंनि जिउ खहा आरो जख’म जायाखै होनना मिथिनो मोन्दों।

आमेरिका आरो इरान हादतनि गेजेराव जेंना सोमजिदों

By
BODOLAND रादाब
-
0
Tension between America and Iran, Oil tanker seized

गोदान दिल्ली,28 मे 2022: इरान आरो सोनाबयारि हादतफोरनि गेजेराव फिन खनसेबाव जेंना सोमजिदों। आमेरिकाया होबथानायखौ सिफायनायनि दायाव ग्रिचनि हेफाजाबजों इराननि गंनै थाव टेंकिखौ जब्द खालामदों। बेनि फिनजाथाय होनानै इरानयाबो ग्रिचनि गंनै थाव टेंकिखौ जब्द खालामफिनदों। लोगोसेनो साग्रांथि होनानै बुंदों जुदि गावसोरखौ एदावब्ला बेनि फिनजाथायखौ होफिनगोन।

मख’नो गोनांदि इराननि रिभलुसनारि गार्डआ फोरमायनाय बायदिब्ला फारसनि लैथोमाजों थांबाय थानाय ग्रिचनि गंनै थाव टेंकिखौ जब्द खालामनाय जादों। गंनैबो थाव टेंकियाव ग्रिच हादतनि हारिमायारि फिरफिला बिरहोनाय दंमोन।बेनि सिगां आमेरिकाया ग्रिचनि हेफाजाबजों भूमध्य लैथोमायाव इराननि गंनै थाव टेंकिखौ जब्द खालामदों।आमेरिकाया दाय जाबसिनदों इरानआ हारिमायारि होबथानायखौ सिफायदों,बेनि फिनजाथाय होनायाव बेबायदि बिजिरनाय जादों।

गुन्द्रासा हाबा फारिखौ लानानै इरान आरो सोनाबयारि हादतफोरनि गेजेराव जेंना सोमजिनाय समावनो रिभलुसनारि गार्डआ बेबायदि बाथ्राखौ फोरमायदों।गार्डआ गावनि वेबसाइटयाव मोनसे बिबुंथि फोसावनानै सिनाय मोनयै टेंकारनि सायाव इराननि नेम खान्थिखौ सिफायनायनि दाय जाबसिनदों।।

गुबुन फारसेथिंजाय ग्रिचनि गुबुन हादतनि मावख’या बुंदों फारसनि लैथोमायाव गावसिनि गंनै जाहाजखौ इरानया हिंसायारि महरै जब्द खालामनानै लादों।बेनि सायाव ग्रिचया एथेन्सयाव थिसन जानाय इराननि थान्दैनि सिगाङाव गोख्रों अजद होदों।लोगोसेनो थाव टेंकिखौ हगारफिनाब्ला बेनि हेंथायै बिजिनाय जागोन होननानै फोरमाय बावदों।

दरनै हादतफोरनि गेजेराव बेबायदि जेंना सोमजिनाया इयुनाव गाज्रिसिन महर लाहैगोन होननानै सुलुंफोरा हमदांनानै लादों।

लाद्दाकआव गंसे बासआ गोथौ हाखराव गलांनानै सा 7 सान्थ्रिआ जिउ खहा, सा 19 जोखोम

By
BODOLAND रादाब
-
0
Army died in bus accident in Ladakh

लाद्दाक, 28 मे 2022: मोनसे दुखुनांथाव खौरां। दिनै लाद्दाकआव भारतीय सान्थ्रिनि गंसे गारिआ गोथौ हाखराव गलांनाय जाथायाव खमैबो सा 7 सान्थ्रिफोरा जायगायावनो जिउ गोमादों। लाद्दाकनि स्येक दैमायाव हरखाब गारिआ गलांनाय बे जाथायाव सा 7 सान्थ्रिफोरा जिउ खहा जानायजों लोगोसे सा 19 सान्थ्रिफोराबो गोब्राब जोखोम जादों।

सान्थ्रिनि सुलुङा फोरमायनाय बादिब्ला, लाद्दाकनि टुरटुक सेक्टरनि मोनसे केम्पनिफ्राय गासै सा 26 सान्थ्रिफोरखौ गंसे बासजों लानानै गुबुन मोनसे केम्पआव लानानै थांदोंमोन। नाथाय दुखुनांथाव बाथ्रादि, लाद्दाकनि स्येक दैमानि गोथौ हाखराव सान्थ्रिफोरखौ लांनाय बासआ हरखाब गलाङो।

जाहोनाव, बे जाथायाव जायगायावनो सा 7 सान्थ्रिफोरनि जिउ गोमानायखौ मिथिनो मोन्दों। सुलुंनि बादिब्ला, जाथायाव जोखोम मोन्नाय सा 19 सान्थ्रिफोरखौ फाहामथाय होनो हेलिकप्टारजों गोख्रैनो देहा फाहामसालियाव लांनानै थांदों। नाथाय बिसोरनि गेजेराव गुबुन सानै सान्थ्रिनि देहा हालोदआ दासिम जोबोद गोब्राब होन्नानै सान्थ्रिनि सुलुङा फोरमायबावदों। बे जाथायखौ खौरां मोन्नानै हादरगिरि रामनाथ कभिन्ड आरो गाहाइ मन्थ्रि नरेन्द्र मडिआ गोथौ दुखु मोन्नाय फोरमायदों।

NSCN-IM आ नागा सान्ति सावरायनायखौ लानानै NPF-BJP दैदेनगिरिफोरनि बुंनाय बाथ्राखौ सोंखारिदों।

By
BODOLAND रादाब
-
0
NSCN-IM

नागालेन्ड 28 मे, 2022: NSCN-IM आ गोबाव समनिफ्रायनो नागा राजखान्थियारि जेंनाखौ लानानै सरकारनिसिम दाबि दैखां बोबाय थाबोदों। आखायाव हाथियार हमनानै गोलाव सम सोमावसारनायनि गेजेरजों सरकारजों दासान्दि सान्ति सुक्तिनि थाखाय सावरायलायनायाबो सोलिगासिनो। नाथाइ, सावरायबाय थागासिनो दंब्लाबो दिनैसिम्बो समादानाव फैयाखै। बेखौ लानानै NSCN-IM नि दैदेनगिरि बिथांमोनहा गोजोननाय मोनाखै। बावयैसो सान सिगां BJP आरो NPF नि आयेन बानायगिरिफोरा नागाफोरनि राजखान्थियारि जेंनानि सायाव अनागारि सोदोब बाहायनायाव NSCN-IM नि दैदेनगिरिफोरा गोजोननाय मोनाखै। आरो आयेन बानायगिरिफोरनि बे बाथ्रा बुंनायखौ सोंखारिदों। BJP आरो NPF नि आयेन बानायगिरिफोरा नागा राजखान्थि जेंनाखौ समादान खालामनो थांयाव गावसिनि खामानिखौ मोजाङै मावाखै आरो गावसिनि फावनि सिमनाखौ बारदों होनना बुंदों।

NSCN-IM आ नागा राजखान्थियारि जेंनाखौ थाबैनो सुस्रांजानायखौ लुबैयो आरो रावबो बे जेंनाखौ गोलाव सम थानायखौ लुबैयाखै होनना गावसिनि बिबुंथियाव बेरखां होयो। बे जेंनाया सुस्रांजानायनि अनगायै सानसेनि उनाव सानसे मोन्दांथिगोनां जागासिनो दङ होननाबो बुंथियो बिथांमोननि दैदेनगिरिफोरा।

NSCN-IM आ गावसिनि बिबुंथियाव बेरखांहोबावदोंदि नागाफोरनि राजखान्थियारि जेंनाया मैया दाख्लैसो सोमजिनाय नङा बियो गोलाव सम सिगांनिफ्रायनो नुजाथिनाय मोनसे गोजाम आरो नंगुबै जेंनानि दाबि। बेनिखायनो, BJP आरो NPF आरो गुबुन राजखान्थि हान्जानि आयेन बानायगिरिफोरा बेखौ आबुङै दिनैसिम्बो हमदांनो हानायाव फैमाल जादों। आरो गावसिनि राजखान्थियारि मुलाम्पानि थाखायल’ बे जेंनाखौ सुस्रांनायनि मुङाव सावरायगासिनो होननाबो सोमावसारारि दैदेनगिरिफोरा बुंदों। नागाफोरनि जेंनानि सुस्रांनाया जेंनानि सायाव आरो सोमावसारनायनि सायाव बिथा खालामनानै जाथारनांगौ होननाबो फोरमायो दैदेनगिरिफोरा।


बे गोलाव समनि राजखान्थियारि जेंनाखौ सुस्रांनायनि थाखाय जुदि मोननैबो हान्जाया समानै सुस्रांनायनि थाखाय हाबा मावयोब्ला मोनसे मोजां समादाननि फिथाइखौ मोननो हागोन। आरो नाजानाया एरैनो दैयाव थांनाय नङा आरो मोननैबो हान्जाया गावजों गाव बुजिलायनानै आरो सन्मान होलायनानै हाबा मावयोब्लानो जेंनाया सुस्रां जागोन होननाबो फोरमाय बावयो।

1...929394...96Page 93 of 96

Follow Us On

311,000FansLike
2,714FollowersFollow
203,000SubscribersSubscribe

Latest News

EDITOR PICKS

POPULAR POSTS

POPULAR CATEGORY

©