गोदान दिल्ली, 3 मे 2022: सोनाब बंगनि गिबि मन्थ्रि ममता बेनार्जीया इद फोरबोनि खाबुयाव सुबुंफोरखौ सोमोनदो लानानै बुंदों दावराव दावसि सोमजिहोनानै हादतखौ गावस्रा होनाय राजखान्थि सोलिदों।नाथाय बेबायदिया गाहाम जायाखै।जों सुबुंफोरनि गेजेराव खौसेथियै थानायखौ लुबैयो। मोजां सानया फैगोन, नाथाय बयबो सुबुंफोरजों लोगोसेयैसो फैगोन। बयबो खौसेयै थानानै हाबा फारि मावनांगोन।जाय सुबुंफोरा हिन्दु मुस्लमानफोरखौ गावस्रा होनायनि बाथ्रा बुङो बिसोरनि खोथाखौ खोना संनो नाङा। ममताया बुंबावदों,बिसोरबायदि सुबुंफोरा गावखौ गोबां सोंखारि।नाथाय नोंथांमोनहा आंनो दावहा नांनो गोहो होदों,बेनो आंखौ देरहासात खालामो।सोनाब बंगायाव सुबुंफोरनि गेजेराव जेरैबायदि खौसेथि दं , बेबायदिया भारतनि गुबुन रायजोयाव गैया।बेबायदि खौसेथिखौ नुनानै थुज्लायग्रा सुबुंफोरा गिखाङो।जायनि जाहोनाव आंखौ लाजिफोनाङो।इयुनावबो बेबायदि सुबुंफोरा आंखौ लाजिफोनांबाय थागोन। नाथाय जों गिख’ नङा, बेबायदि सुबुंजों जों दावहा नांनो रोंगौ।
रासियाआ जार्माननिखौ हुमखि होदों
गोदान दिल्ली, 3 मे 2022: रासिया आरो इउक्रेननि दावहा नांनाया सोलिबाय थागासिनो दं।बेनि गेजेराव रासियाआ जार्माननिखौ हुमखि होनानै बुंदों इउक्रेनखौ मदद खालामब्ला दावहायाव बाहागो लायैनि दिदोमथिखौ खोमाना लानांगोन।रासियानि रिर्पटनि बायदिब्ला जार्माननि बुंथिगिरि Steffen Hebestreit बुंदों थांनाय 6 सप्ताहयाव इउक्रेननो हाथियार दैथाय हरनायखौ गोख्रैसिन खालामदों। बिथाङा बे बाथ्राखौ मानिनानै लायाखै, जार्मानयाव बानायनाय आमेरिका बेसयाव इउक्रेननि रौनियानो ट्रेनिं होनायजों रेड लाइनखौ क्रस खालामनाय जादों।नाथाय रासियाआ बे बाथ्राखौ मोजांयै मोनथिखागौजे जार्मानियाव इउक्रेननि रौनियानो ट्रेनिं होनायनि ओंथिया जादों थोंजोंयै दावहा नांनायाव बाहागो लायै।मख’नो गोनांदि जार्माननि सरकारा थांनाय सप्ताहयाव इउक्रेननो अटमेटिक एन्टी-एयारक्राफ्ट हाथियार दैथायहरनो थांखि लानायखौ फोसावदोंमोन।जार्माननि रैखाथि मन्थ्रि क्रिस्टीन सेम्ब्रेचआबो आमेरिकानि Ramstein Base याव बार्लिन वेस्टार्न आर्टिलारि सिस्टमजों लोगोसे इउक्रेननि रौनियानो ट्रेनिं होनायनि बाथ्राखौ फोसावदोंमोन।
लखिमपुर जिल्लायाव ड्रागसजों लोगोसे साथाम सुबुंखौ हमदों
लखिमपुर, 3 एप्रिल 2022: आयेननि बेरेखायै ड्रागसनि फालांगि खालामनाया ओनसोलआव दासानदि गोबां सोलिगासिनो दं। बे जाथाइयावनो आसामनि लखिमपुर जिल्लायाव रबिबारखालि ड्रागजों लोगोसे सानै ड्रागस फालांगियारिफोरखौ हमनो मोनो। हमजानाय सानै सुबुंखौ रमाकान्त गाम आरो बिनि बिसि मीना बरी होननानै मिथिनो मोन्दों। आसाम आरो अरुणाचल प्रदेसनि पुलिस हानजाया जयै लोगो नांनानै संदाननायाव हमजानाय ड्रागस फालांगिफोरनिफ्राय सिग्रोमनायाव 5 ग्राम ड्रागस मोननो हादोंमोन। सिग्रोमनायनि गेजेरजों पुलिस हानजाया हमजानाय सुबुंफोरनि 8 बोसोरनि सासे उन्दै फिसाज्लानि इनिफर्मनिफ्रायबो ड्रागस मोननो हायो।
आरोबाव गुबुन सासे हमजानाय सुबुंखौ जितेन बिस्वास होनना सिनायनो मोनो। पुलिसआ बुंथिनाय बादिब्ला, सिगाङावबो बिखौ ड्रागस फालांगि खालामनाय दायाव जोबथेसालिआव दोननाय जादोंमोन नाथाय दा बिखौ जोबथेसालिनिफ्राय उदां खालामनानै होनायाव बियो फिन बे खामानिखौनो मावफिनबावदों।
पाकिस्ताननि बारग’ गाहाइ मन्थ्रि इमरान खानखौ जायखिजाया समावनो हमनो हासिगौ
काराची, 2 मे 2022: पाकिस्ताननि बारग’ गाहाइ मन्थ्रि इमरान खानखौ जायखिजाया समावनो हमनो हासिगौ। मोनसे सुलुंनिफ्राय मिथिनो मोन्नाय बादिब्ला, पाकिस्ताननि गाहाइ मन्थ्रि शाहबाज शरीफनि हेंथायै सोंखारिनाय, हस्रिखावनायनि दायाव बारग’ गाहाइ मन्थ्रि इमरान खानजों लोगोसेनो सा 150 सुबुंफोरनि हेंथायै केस थिसन्नाय जाबाय। पाकिस्तान सरकारनि खुंथाय दोलोयाव थानाय PML-N नि हेफाजाबगिरिया फोरमायनाय बादिब्ला, मदिनायाव नुजाथिनाय जाथाया इमरान खाननि बिथोनआवनो जादों। बे जेंनानि सायावनो पाकिस्तान सरकारनि नखर बिफाननि मन्थ्रि राणा सनाउल्लहआ बुंदोंदि, बारग’ गाहाइ मन्थ्रि इमरान खानखौ मदिनायाव नुजाथिनाय जाथायाव लोब्बा थानायनि थाखाय हमनाय जागोन।
मखनो गोनांदि, पाकिस्ताननि इस्लामाबादआव बे जेंनाखौ लानानै केस थिसन्नाय जादों। जेराव इमरान खानजों लोगोसे सा 150 सुबुंफोरनि हेंथायै केस जाबसिन्दों। बारग’ गाहाइ मन्थ्रि इमरान खाननि सायाव मदिना बायदि मजिदनि गोथार जायगाखौ गुबुंले खालामनायनि गोख्रों केस थिसनबावदों। जाहोनाव, बारग’ गाहाइ मन्थ्रि इमरानआ गावनि खुंथायनिफ्राय दोरोदनाय लोगो-लोगो जेंनायाव गोग्लैदों आरो बे जेंनानिफ्राय बारगनो गोब्राब जागोनखौ नुनो मोन्दों।
अखा मोफ्लामनायजों एप्रिल दानाव आसामाव गासै सा 18 सुबुंनि जिउ खहा
गुवाहाटी, 2 एप्रिल 2022: आसाम बोथोर बिफानआ बुंथिना होनाय बादिब्ला, जरहाट, डिब्रुगर आरो धुब्रि जिल्लायाव गोब्राब अखा मोफ्लामनाय आरो सारअन्थाइ गावनायजों सुक्रुबारनिफ्राय सनिबारसिमाव गासै सा 3 सुबुंआ जिउ खहा जायो। आसामनि गुबुन गुबुन जायगाफोराव अखा मोफ्लामनाय आरो सारअन्थाइ गावनायनि जाहोनाव एप्रिल दानाव गासै सा 18 सुबुंफोरा जिउ खहा जायो। सुलुंनिफ्राय मिथिनो मोननाय बादिब्ला, रायजोआव न-बांफोरा खहा जानायजों लोगोसेनो गोबां धोन सम्फतिफोरा खहा जानांबाय। एप्रिल दानआ जागायजेननायनिफ्रायनो जुब जुब अखा हाबाय थादोंमोन। आसामनि बोथोर बिफानआ बुंथिना होनाय बादिब्ला, जरहाट, डिब्रुगर आरो धुब्रि जिल्लायाव सान्थाम बोथोरनि थासारिआ गाज्रि जानानै अखा मोफ्लामनायनि जाहोनाव गासै सा 14 सुबुंनि जिउ खहा जादों।लोगोसेनो बुंथियोदि, गासै 325 गामिफोरनिफ्राय 4,630 सुबुंफोरा बोथोर गाज्रि जानायनि जाहोनाव गोबां जेंनाजों गोग्लैनो गोनां जादों। गामिनि नफोरजों लोगोसे फरायसालिआबो खहा जादों। मोब्लाब खुन्थिया गोग्लैनाय बिफां बायसिननायनि जाहोनाव हान्था मेला खालामनायाव जेंना नुजाथिदों
आसामनि राइना जापारआ टेनिस गेलेनानै जाफुंसार फिथाइ मोननो हादों
गुवाहाटी, 2 एप्रिल 2022: आसामनि गुवाहाटीनि टेनिस गेलेगिरि राइना जापारआ US आव खुंजानाय टेनिस बादायलायनायाव बाहागो लानानै गावनि गोख्रों नाजानानै गेलेनायनि गेजेरजों जाफुंसारनो हानानै भारत हादरजों लोगोसे आसाम रायजोनि गोग्गानाय लाबोनो हादों। बावयैसो सान सिगां Arlington Tennis Center आव जानानै थांनाय Lone Star Conference Tournament सेमिपाइनाल बादायलायनायाव राइना जापार आरो बिथांनि लोगो माया डंखरआ केमेरुन बुहुम फरायसालिनि आनास्तासिया उसपेन्सकाइया आरो मागदा वारस्काखौ फेजेननो हायो। गासै 6-3 राननि फारागथिजों फेजेननानै गावसिनि जाफुंसारनायखौ मोननो हादों। मख’नाया गोनांदि Texas A&M University आ Texas State नि top फरायसालिमानि गेजेराव गंसे। आमेरिका हादरनि देरसिन बुहुम परायसालिमानि गेजेरावबो गंसे। थारैनो नांथाब आरो नाजानाय थायोब्ला जाफुंसार जानायाव रावखौबो हमथानो हाया बे बाथ्राखौ फोरमान खालानदों राइना जापारआ।
तामुलपुराव मोनसे मुगैथाव जाथाय! बिफायानो गावनि फिसाजोखौ इनायै जिनाहारि
तामुलपुर, 2 मे 2022: बिटिआरनि तामुलपुर जिल्लायाव सुबुं माहारिखौ लाजिफोनांनाय मोनसे मुगैथाव जाथाय। बिफायानो गावनि आंगो फिसाजोखौ इनायै जिनाहारि खालामदों। बे जाथाया तामुलपुर जिल्लानि सिङाव थानाय कुमारिकाताआव नुजाथिदों। जाथायनि बागै मिथिनो मोन्नाय बादिब्ला, फुंनि समाव जौ फेनाय बिफाया न’आव रावबो गैयै खाबुखौ लानानै गावनि 13 बोसोर बैसोनि फिसाजोखौ इनायै जर-जुलुम जिनाहारि खालामनो नाजाबाय थानाय समावनो हिन्जावसानि गाबख्रावनाय सोदोबखौ खोनानै बिबैआ खारबोयो आरो हिन्जावसाखौ लांसुनिया बिफानिफ्राय रैखा खालामो।
बे मुगैथाव जाथायखौ मिथिनानै साखाथिनि सुबुंफोरा नखराव जमा जाफैयो आरो खौरां हरनाय लेखायै कुमारिकाता पुलिसआ नखराव सफैनानै लांसुनिया बिफाखौ हमो आरो बेनि हेंथायै PS C/No 85/22, U/s- 376 IPC & R/W Sec 4 of POCSO Act. नि गसरखौ पुलिसआ आजावना लानानै दासान्दि लांसुनिया बिफानि हेंथायै साजानि गेजेरजों सोंनाय-फिननाय खालामनाया सोलिगासिनो होन्ना पुलिसनि सुलुङा फोरमायदों।
ब्रिटेइननि गाहाइ मन्थ्रि बरिस जनसनआ युक्रेननि हादरगिरि जेलेन्सकिजों सावरायलायदों
गोदान दिल्ली, 2 एप्रिल 2022: ब्रिटेइननि गाहाइ मन्थ्रि बरिस जनसनआ युक्रेननि हादरगिरि जेलेन्सकिजों मारिय’पलनिफ्राय सुबुंफोरखौ इउ एनआ रैखाथियै दिहुननो नाजानायखौ सावरायदों।ब्रिटिस सरकारनिफ्राय बावयैसो समाव फोसावनाय बिबुंथिनि बायदिब्ला ब्रिटेइनआ युक्रेननो रांखान्थि आरो सुबुंथिनि हेफाजाब होनो खोथा होदों। इउ एन बिबानगिरिया बुंदों, बे ओनसोलाव 1 लाख सुबुंफोरा थाबथानानै दं आरो बिसोरनाव जाग्रा आदारनि आंखाल जादों।बे ओनसोलाव जाग्रा आदार आरो मुलिफोरखौ जगायना होनायजों लोगोसे सुबुंफोरखौ रैखाथियै दिहुननो थाखाय दावहा दोनथ’नायखौ नेनानै थागासिनो। युक्रेन सरकारा बुंदों, आगुनि सभियेत संघनि समाव बानायनाय स्टील प्लान्टयाव दासिमबो 1 रोजा सुबुंफोरा थाबथानानै दं।जनसननि डाउनिं स्ट्रीट मावख’या बुंदों, युक्रेननि थागिबिफोरा गावसोरनि उदांस्रिनि थाखाय दावहा नांदों आरो बेयो युक्रेनखौ गोख्रों खालामनायजों लोगोसे रासियानि हादरगिरि ब्लादिमीर पुतिनखौ फेलें खालामनो थाखाय आगुनिफ्राय बांसिन नाजासिननाय। बेजों लोगोसेनो ब्रिटेइनआ युक्रेननो गोनांथि हाथियार दैथायहरनो थाखाय उफ्रा सान्थ्रिनि हेफाजाब होनायखौबो लाखिलांबाय थागोन होननानै बुंबावदों।
गाहाइ मन्थ्रि नरेन्द्र मडिआ सानथामनि हाबाफारिजों इउरप हादराव दावबायलांबाय
गोदान दिल्ली, 2 मे 2022: भारतनि गाहाइ मन्थ्रि नरेन्द्र मडिआ गासै सान्थामनि हाबाफारिजों इउरप हादरआव दावबायलांबाय। दिनै 2 मे अक्टआव गोदान दिल्लीनिफ्राय गाहाइ मन्थ्रि मडिआ गावनि सान्थामनि हाबाफारिजों दावबायनायखौ जागायजेन्नानै इउरपनि दर 3 हादरफोरनि गेजेराव जार्मानी, डेनमार्क आरो फ्रान्सआव सहैगोन। भारत सरकारनि गुबुन हादरारि बिफाननि सुलुंआ फोरमायनाय बादिब्ला, भारतनि गाहाइ मन्थ्रिआ इउरपनि दर 3 हादरफोराव दावबायहैनानै गासै 65 घन्टानि गेजेरावनो मोन 25 जथुम्माफोराव बाहागो लागोन आरो दावबायनायनि हाबाफारि बादियै गाहाइ मन्थ्रिआ जार्मानीनि राजथावनि बार्लिनआव सहैगोन। गावनि दावबायनायाव गाहाइ मन्थ्रिआ जार्मानीनि चेन्सेलर अ’लाफ स्क’ल्जजों मोगा-मोगि लोगो हमनानै सावरायगोन आरो बार्लिनआवनो भारतनि फोलेरारि सुबुंफोरजों सावरायगोन।
बेनि उनाव 3 मे खालाराव इन्ड’-नार्डिक सम्मेलनआव गाहाइ मन्थ्रि मडिआ बाहागो लाखांनायनि उनाव डेनमार्कनि राजथावनि क’पेनहेगनआवबो भारतनि फोलेरारि सुबुंफोरजों सावरायनायाव बाहागो लागोन। दावबायनायनि जोबथायाव गाहाइ मन्थ्रि नरेन्द्र मडिआ पेरिसआव फ्रान्सनि हादरगिरि इमानुयेल मेक्र’जों माखासे गोनांथार आयदाफोरखौ लानानै मोगा-मोगि सावरायगोन। जेराव, दासान्दि रासिया आरो युक्रेननि गेजेराव सोलिबाय थानाय दावहानि सोमोन्दोयाव दरनै हादरनि दैदेनगिरिया सावरायगोन।
मखनो गोनांदि, गाहाइ मन्थ्रि नरेन्द्र मडिआ थांनाय माखासे समनि उनाव इउरप हादर दावबायहैनाया भारतनि थाखाय जोबोद गोनांथार जादों। मानोना गाहाइ मन्थ्रि मडिआबो गावनि सान्थामनि हाबाफारिजों इउरप हादर दावबायहैनायनि सिगां बे समनि दावबायनायखौ जोबोद गोनांथार होन्नानै फोरमायदों।
