बाक्सा जिल्ला सिमला थानानि सिङाव थानाय लोखि बाजार रान्धनिपारा गामिनि थागिबि लोगोसे बाक्सा जिल्ला एबसुनि लोगो आफादगिरि हांगामा बर’नि अनजालि बिसि आरो आथिखालनि मिरु एबसुनि लोगो हारिमु नेहाथारि कनिका बर’आ मैया मोनाबिलिनि समाव हरखाबै लामानि जाब्रथाइजों जिउ खोमाना लानो गोनां जायो। मिथिनो मोननाय बादिब्ला मिरु एबसुनि लोगो हारिमु नेहाथारि कनिका बर’आ मैया मोनाबिलिनि 6:30 रिंगायाव बाजार खालामनानै AS01DY5295K10 मारुटी गारिजों बिसि-फिसाइ न’ फारसे फैफिननाय समाव दावधारानिफ्राय पाटसाला थांग्रा 127(A) नं राजा लामानि राङापानियाव हरखाबै बारग’ आर्मी सिलाम चन्द्र गयारीआ जौ फेनानै AS15S3068 नाम्बारनि एल्ट गारिजों फैनानै मोगा-मोगि सौग्रावनानै होनायाव कनिका बर’आ गोब्राबै जोखोम जायो। लोगो-लोगो गोब्राबै जोखोम जानांनाय कनिका बर’खौ फाहामथाइनि थाखाय देहाफाहामसालिसिम लानानै थाङो, देहाफाहामसालिसिम लांबाय थानाय समावनो लामा ससेयावनो कनिका बर’आ जोबथा हां हगारो। जिउ गैयै कनिका बर’नि गोथै सोलेरखौ मुसलपुर ड० रबि बर’ मेडिकेलाव POSTMORTEM खालामो।
कनिका बर’नि गोथै सोलेरखौ फिसाइनि न’खराव लाबोनायनि गेजेरजों आंगोनि फिसाइ हांगामा बर’जों लोगोसे न’खरनि आंगो बिमा-बिफा, बिदा-फंबाइ, बिब’-बिनानावजों लोगोसेनो आसामनि मन्थ्रि उर्खाव गोरा ब्रह्म, एम एल ए जयन्त बसुमतारी, मिरु एबसुनि आफादगिरि दिपेन बर’, गाहाइ नेहाथारि खनिन्द्र बसुमतारी आरो बर’नि बायदि गौथुमारि आफाद आरो राजखान्थियारी आफादनि दैदेनगिरि बिथांमोनहा आर’नाइ आरो बिबार माला होनानै दुखुनि गेजेरजों कनिका बर’नि गोथै सोलेरखौ बिदाइ होनानै मान बावो।
