नगाव, 19 जुन, 2022: आथिखालाव गोबां सोमोनांथाव आरो गिख्रंथाव जाथाइ जाबाय थानायखौ जों नुनो एबा खोनानो मोनो । सोरखौबा लांखारनाय, सोरखौबा बुथारनाय, सोरखौबा जिनाहारि खालामनाय, सोरखौबा सिगि-सग खालामनानै रां दाबिनाय जाथाइया फ्राय नुजाथिबाय थायो ।
बेबादिनो सनिबारखालि बेलासि समाव नगावनि डिहिं ओनसोलआव थाखो 9 आव फरायनाय सा 4 उन्दै हिन्जावसाफोरा जेब्ला टिउसननिफ्राय न’ फारसे फैफिन्दोंमोन अब्ला, मानसि लांखारग्रा दायनिगिरि मइना आली आरो बिनि हानजाया बिसोरखौ हमख्रबनानै फाथोबारियाव खानानै दोन्दोंमोन । अदेबानि बे गासै जाथाइया केमेरानि सिङाव रेकर्ड जानानै थादों । पुलिसआ बुंथिना होनाय बादिब्ला, ओनसोलनि सुबुंफोरा हिनजावसाफोरनि मदद बिनानै हस्रिखावनायखौ खोनानानै बिसोरखौ रैखा खालामफैदों ।
जाथाइनि फारसे खौरां हरनाय लोगो-लोगोनो पुलिसआ जाथाइथिलिसिम सौफैदों आरो दा जाथाइनि सायाव नायबिजिरनाय हाबाफारिखौ पुलिसआ जागायजेनबाय । सुलुंनि गेजेरजों मिथिनो मोननाय बादिब्ला, दायनिगिरि मइना आलिआ सिगाङावबो बेबादिनो गोबां सिखाव खावनाय, बुथारनाय आरो जिनाहारि खालामनाय दायफोराव आखाइ दंमोन । बेनि सायाव गोबां रोखोमनि केसबो दं होनना बुंथिना होदों नगाव आरो मरिगावनि पुलिस बिबानगिरिआ । लोगोसेनो बे दायनिगिरिखौ थाबैनो आयेनबादियै साजा होगोन होननानै बुंथिदों ।
