झारखाण्ड, 18 जुन, 2022: झारखाण्डनि रान्चीयाव मोनसे सोमोनांथाव जाथाइ । सासे सेंग्राया गावनि मोजां मोननाय सिख्लानि न’आव हाथुरा लानानै गाग्लोबहैदों । सेंग्राया न’ सिङाव हाबनानै सिख्लाजों लोगोसे बिनि फंबाइखौबो हाथुराजों देयै-देयै जिउ फोजोबदों । मिथिनो मोननाय बादिब्ला, सिख्लानि बिमाखौबो देगारजों गाग्लोबदोंमोन आरो बिमाया गोब्राबै जोखोम जादों । बिमाखौ दा देहा फाहामसालिआव फाहामथाइ होनो थाखाय थिसनबाय होनना मिथिनो मोन्दों । बिमाया बुंथिना होनाय बादिब्ला, बे सेंग्राजों लोगोसे आरोबाव सानै लोगो दंमोन । सेंग्रानि नख’र आरो सिख्लानि नख’रनि गेजेराव सिगांआवबो गोबां दाङाबाजि जाखांबाय । दायनिगिरि सेंग्राया जाथाइ जाखांनायनि उनाव दा खारखोमानानै दं होनना मिथिनो मोन्दों ।
सुलुंनि गेजेरजों मिथिनो मोननाय बादिब्ला, बे जाथाइया रान्चीनि जनकपुर ओनसोलआव जादों । थाखो 12 आव फरायनाय सासे फरायसुलि आरो 14 बोसोर बैसोनि फंबायखौ दुथां सेंग्राया हाथुराजों गाज्रियै बुनानै बुथारदों । जाथाइनि गुबै दायनिगिरि सेंग्राया बै सिख्लाखौ मोजां मोनोमोन नाथाय सिख्लाया बे सेंग्राखौ एसेबो मोजां मोना जायनि जाहोनाव सेंग्राया बेबायदि गिथावना हाबाखौ मावदों । बे जाथाइया दिनै फुंनि 3.30 रिंगायाव जादोंमोन ।
जाथाइयाव जिउ गोमानांनाय बिब फंबाइ श्वेता आरो प्रबीनआ DAV PUBLIC SCHOOL आव फरायोमोन । बिसोर गावसोरनि बिमा चन्दा देवीजों लोगोसे जनकपुराव गंसे भारा न’आव थायोमोन । बिसोरनि बिफाया आबुधाबीआव साख्रि मावो । जाथाइनि खौरां मोननाय लोगो लोगोनो बिफाया न’ फारसे फैफिनदों । दायनिगिरि सेंग्राखौ दा पुलिसआ थाबैनो हमनो थाखाय नागिरनाय हाबाफारिया सोलिगासिनो दं ।
