गुवाहाटी, 28 जुलाइ 2022: गुवाहाटी नोगोराव गोब्राब नाजानायनि उनाव उन्दै लांखारनाय जाथाइया सोरांआव फैगासिनो दं । बुधबारखालि GUAWAHATI MEDICAL COLLEGE AND HOSPITALआव हमनो मोन्दों उन्दै गथ’खौ लांखारनो नाजानाय सानै आइजो । मार्च दाननि उनाव GMCH आव गिबि खेब बे जाथाइया सोमजिदों ।
रिपर्टनि बादिब्ला, सानै आइजोआ उन्दै गथ’खौ लांखारनो नाजानायावनो GMCH नि सिकिउरिटि पारसनेलआ हमनो मोन्दों । हमनो मोननाय सानै आइजोखौ प्रमिला देका आरो बिजिता दास होनना सिनायो हादों । बे सानै आइजोखौ उन्दै लांखारनाय कन्ट्रेक्टआव खामानि मावदों होनना मिथिनो मोननाय जादों । बे जाथाइनि सायाव गोख्रोङै नायबिजिरनाया सोलिगासिनो दं ।
