आमेरिका, 29 आगष्ट, 2022: TESLA आरो SPACEX नि CEO एलन मास्क मुलुगनि धोनिसिन सुबुं । नाथाय आमेरिकायाव बिहा गावनि निजा न’ गैया । बांसिन सुबुंफोरानो मिथियोदि बियो गावनि बांसिन समखौ अफिसआवनो हगारहरो । बेनि गेजेरावनो एलन मास्कनि बिमाया मोनसे बाथ्रानि खेंफोरथि होदों । एलन मास्कनि बिमा 74 बोसोर बैसोनि MAYE MUSK आ जेब्ला गावनि फिसाज्लाखौ लोगो हमनो टेक्सासनि SPACEX अफिसआव फैयो अब्ला बियो गेरेजआवनो उन्दुनो गोनां जायो । मिथिनो मोननाय बादिब्ला, मास्कआ आथिखालाव SPACEX अफिसनि साखाथियाव गंसे भारानि एपार्टमेन्टआव थायो । मास्कआ गोबां खेब गावनि न’ गैयै बाथ्राखौ बुंथिबाय । गोबां खेब बियो गावनि लोगोफोरनि न’आव थानानै सम बारहोयो । फ्रजेक्ट लन्स खालामनो थाखाय बियो गोबाव सम अफिसआवनो समखौ हगारहरो आरो बेयावनो उन्दुनो गोनां जायो । एलन मास्कआ 2020 आव टुइटारआव बुंदोंमोन, ‘आं गासैबो धेन-सम्पथिफोरखौ फानजोबसिगोन । आंहा गंसे नबो थानाय नंलिया’ । दा सन्डे टाइम्सनि मोनसे इन्टारभिउआव एलन मास्कनि बिमाखौ जेब्ला फिसाज्लानि SPACEX मंगल ग्रहआव लांनायनि सोमोन्दै सोंदोंमोन अब्ला बियो ओरैबायदि फिननाय होदों – बियो बुंदों, एलन मास्कआ बिखौ अखाफोरआव लांनायनि खोथा होदों । जेब्ला बिखौ मंगल ग्रहआव थांनो गोसो दं नामा होनना सोंनायाव बियो बुंदों, ‘‘बेनि थाखाय 6 दानसिम थियारि आरो आइसलेसन खालामनांगोन जाय आं मोजां मोना नाथाय आंनि फिसाज्लाया बेबादिखौ लुबैयोब्ला आं थांगोन’’ ।
