कार्बि आंलं जिल्ला दुलाराय बर’ फरायसा आफादनि 52थि बोसोरारि जथुम्माजों लोगोसे स’नाथि मायथाइ फोजोबनाय जथुम्मा, 32थि कार्बि आंलं जिल्ला दुलाराय बर’ साख्रि आवला आफाद आरो सेलाबर द’खरा बर’ मोखां आफादनि बोसोरारि जथुम्मानि गाहाइ खुन्थियाखौ कार्बि आंलं जिल्ला गावखुंथाइ गौथुमनि मानगोनां मावफुं सोद्रोमा थामहिनबा बान्जाइ आफादनि आफादगिरि बिलि महन खाख्लारीआ गायसननानै होयो।
मख’नो गोनांदि 19, 20, 21 आरो 22 डिसेम्बर 2022 खालि सानब्रैनि मेहेर गोनां हाबाफारिजों खुंफुंनो लानाय बे जथुम्मानि गेजेरजों समाज फोसाबनाय, सोलोंथाइ, हारिमु, थुनलाइयारि आरो गेलेनाय बायदि बिथिङाव गुवारै सावरायलायनाय जागोन। सेलाबरनि रिजार्भनि हानि जेंनायाबो जर’खायै बे जथुम्मायाव सावराय जागोन आरो जेंना सुस्रांनाय राहाफोरखौ मोननो हागोन।
बे जथुम्माजोंनो लोबबा लाखिनानै 1970 मायथाइनिफ्राय जाय बिथांमोनहा कार्बि आंलं जिल्ला बर’ फरायसा आफादाव बायदि बिबान लानानै हाबा मावलांनानै रुंग’ लांबाय बै बिथांमोनखौ बरायनायजों लोगोसे मान बाउनायनिबो हाबाफारि लानाय जादों।
22 डिसेम्बर एबा गेवलां मेलाव गाहाइ आलासि महरै दुलाराय बर’ फरायसा आफादनि मानगोनां आफादगिरि दिपेन बर’ लोगोसे जर’खा आलासि महरै बि टि आर नि मानगोनां गाहाइ मावफुंगिरि प्रमद बर’ आरो कार्बि आंलं गाव खुंथाइ गौथुमनि गाहाइ मावफुं सोद्रोमा ड० तुलिराम रंहां बिथांमोनहा बाहागो लागोन।
दिनैनि गाहाइ खुन्थिया गायसननाय हाबाफारियाव मानगोनां मावफुं सोद्रोमा बिलि महन खाख्लारीजों लोगोसे लांहिन नोगोर आफादनि मासिगिरि कमल ब्रह्म आरो जिल्ला बर’ फरायसा आफादनि दैदेनगिरि बिथांमोन आरो हालामनि रायजो-राजाफोरनि बाहागो लानायनि गेजेरजों गोथार हाबाफारिया जोबलाङो।
बिनिखायनो कार्बि आंलं जिल्ला दुलाराय बर’ फरायसा आफाद आरो बान्जाइ आफादा जानो गोनां जथुम्मायाव गासैबो रायजो-राजाफोरजों लोगोसे जिल्लानि गासैबो आफादनि दैदेनगिरि बिथांमोनखौ बाहागो लाफैनो खावलाय हरदों।
