मोसौ गलिनिफ्रायनो हरनि समाव मोसौ खावै खावै लांनाय जाथाया क’क्राझार जिल्लानि दाब दाब ओन्सोलाव थांनाय 3 दान्सो सिगांनिफ्रायनो जाफ्लेबाय थानायखौ खौरां मोनबोबाय थानाय जादों ।
क’क्राझार जिल्लानि तितागुरि, देबोरगाव (बेसरगाव) नि माखासे गामिफोरजों लोगोसे पाटगाव ओन्सोलनि फारियै खालायगाव, काकरमारि गामिफोराव बे जाथाया सोमजिखांनायनि उनाव फिन थांनाय हराव बे रोखोमसे जाथायानो सोमजिबावदों पाटगाव हालामनि दरसे गामिआव ।
थिग बेबायदिनो थांनाय मोनायाव हर गेजेरनि खाबु लानानै क’क्राझार जिल्लानि पाटगाव पुलिस आउटपष्टनि बेन्दोङाव थानाय सा सिजुगुरि(हालांबाजार) गामिनि थागिबि थेंगोना बरगयारी (55) आरो उरबुसि बरगयारी(50)नि माथाम मोसौखौ गलिनिफ्रायनो खावनानै लाङो ।
थेंगोना बरगयारीनि फिसाज्ला दैमालु बरगयारी आ फोरमायहरनाय बायदिब्ला थांनाय मोनानि हर गेजेरनि समाव रावबो मिथयैनि खाबु लानानै थेंगोना बरगयारीनि मानै गिदिर गिदिर हालुवा मोसौजों लोगोसे मासे गाइ मोसौखौबो गलिनिफ्रायनो खावनानै लांनायनि अजद होदों भुगिनांनाय न’खरा ।
