गुवाहाटी, 8 जुन, 2022: आसाम पुलिसनि गोख्रों सिग्रोमनायाव आसामनि दाब 3 गुबुन गुबुन जायगाफोराव ड्रागसजों लोगोसे सा 5 ड्रागस फालांगिरिफोरखौ हमनो मोनो ।
कामरुप जिल्लानि बक’ ओनसोलआव गोख्रों नायबिजिरनायनि गेजेरजों पुलिसआ सासे ड्रागस फालांगिरिखौ हमदों । हमजानाय सुबुंखौ साहागाव, गराइमारि ओनसोलनि थागिबि आलम आली होननानै सिनायनो हादों। बे सुबुंनिफ्राय 13.42 ग्राम हेरइनजों लोगोसे गंनै मबाइल फन आरो नोगोद 31,020 रां बोखांनो हादों । बोखांनो हानाय ड्रागसनि बेसेनखौ 1 लाख रां होननानै पुलिसआ बुंथिदों।
स्रोद सुलुं मोननानै गुबुन मोनसे संदाननाय हाबाफारिनि गेजेरजों आसाम-अरुणाचल प्रदेशनि सिमायाव आरोबाव सासे ड्रागस फालांगिरि हमनो मोनबावो। बे फालांगिरिनि मुंखौ ग्रिसब फुकन होननानै मिथिनो मोन्दों। जायनिफ्राय गासै 9 ग्राम ब्राउन सुगारजों लोगोसे जखा सुग्रा आइजें आरो कन्टेनारबो बोखांनो हायो ।
आरोबाव, पुलिसनि गुबुन मोनसे गोख्रों नायबिजिरनायनि गेजेरजों आसाम हजाइ जिल्लानि सिङाव थानाय दाबाका ओनसोलनिफ्राय गोबां बिबांआव ड्रागसनि टेबलेट बोखांनो हादों,। पुलिसआ फोरमायथिना होनाय बादिब्ला, बे टेबलेटफोरखौ गंसे गारिनिफ्राय मोननाय जादों जेराव PRESS लिरनायनि सिन दंमोन । बे जाथाइजों लोब्बा थानायाव सा 3 ड्रागस फालांगिरिफोरखौ पुलिसआ हमबाय । बिसोरखौ जिंसिं इंति, सेब तेरं आरो राजा तेरं होनना सिनायनो हादों । बिसोर साथामबो दिपु ओनसोलनि थागिबि । बिसोरनि गारिखौ दा कास्टडीआव लाबाय होनना पुलिस बिबानगिरिआ बुंथिदों ।
