गोदान दिल्ली, 2 जुन 2022: आमेरिकाआव सम सम गुलि गावग्लुंनाय जाथाया सोमजिबाय थायो। आमेरिकायाव अक्लाहमानि तुलसा शहराव गंसे देहाफाहामसालिनि लांगोनायाव गुलि गावग्लुंनाय जाथायाव साब्रै सुबुंफोरनि जिउया खहा जायो।
रिर्पटनि बायदिब्ला,तुलसा पुलिसआ हरखाबै खौरां मोनदों,सेन्ट फ्रान्सिस देहाफाहामसालियाव बानायनाय नतालि मेडिकेल बिल्डीङाव फाहामगिरिनि सेम्बराव सासे सुबुङा राइफल लानानै गसंदों। खौरांखौ मोननाय लोगो लोगोनो पुलिसआ जाथायसालिआव सौहैयो।
नाथाय पुलिसआ सौहैजासिमाव सिलाइ लानाय सुबुङा गुलिखौ गावग्लुं खांनायनि उनाव गावखौनो गुलि गावना लाखांबायमोन। तुलसा पुलिसआ प्रेस कन्फ्रेन्स खालामनानै फोरमायदों शुटारनाव गंसे गोलाव सिलाय आरो हेन्डगान दंमोन। बेबायदि गाग्लोबनायनि उनाव बिना मा थांखि दंमोन बेखौ दासिमबो मोनथिनो मोननाय जायाखै। शुटारा गुलि गावग्लुंनाय जाथायखौ देहाफाहामसालिनि सेकेन्ड फ्लराव जाफुंसार होदों।
गुबुन फारसेथिंजाय बे जाथायनि सायाव हवाइट हाउसयाबो नोजोर लाखिदों। हवाइट हाउसनि बिबानगिरिआ फोरमायदों आमेरिकानि हादतगिरि ज’ बाइडेननो तुलसायाव गुलि गावग्लुंनाय जाथायनि खौरांखौ होनाय जाबाय। हादतगिरिआ सम सम गुलि गावग्लुंबाय थानाय जाथायखौ लानानै जिंगा सिदों। हादतगिरिआ थांनाय सानाव निउजिलेन्डनि गाहाय मन्थ्रि जैसिन्डा अर्डारनाव हिंसाजों जुजिनो थाखाय सुबरन बिदोंमोन।
