गुवाहाटी, 3 जुन 2022: कार्बि आलं काउन्सिल बिसायखथिनि खाथि नोजोरावनो गिबि मन्थ्रि हिमन्त बिस्व’ सर्माआ हाजोयारि ओनसोलनि थागिबि सुबुंफोरनि थाखाय मोनसे मोजां खौरांखौ फोसावना होदों। गिबि मन्थ्रि ड. हिमन्त बिस्व’ सर्माआ कार्बि आलं जिल्लायाव काउन्सिल बिसायखथिनि थाखाय बिजेपि दोलोनि बिजाथिनि जानानै फोसावदिंनाय समाव हाजोयारि ओनसोलनिफ्राय थाबैनो आसाम सरकारनि केबिनेटआव गोदान मन्थ्रि महरै थिसन्नाय जागोन होन्ना फोसावदों। गिबि मन्थ्रिआ बुंदों, हाजोयारि ओनसोलनिफ्राय सासे मन्थ्रिखौ फैगौ 9 जुनआव केबिनेटआव थिसन्नाय जागोन। मखनो गोनांदि, काउन्सिल बिसायखथिनि भट सोनाया गेजेराव माखासे सानल’ थाबावनाय साननि गेजेरावनो गिबि मन्थ्रि हिमन्त बिस्व’ सर्माआ हाजोयारि ओनसोलनि राइजो-राजा भटारफोरखौ गोसो थुलुंगाखां होनायनि नोजोरजों बे गोनां थांखिखौ लादों। गिबि मन्थ्रि महरै समाइखिरा लाखांनायनि उनाव हिमन्तनि दैदेन्नाय राज्यो सरकारनि केबिनेटआव सासेबो मन्थ्रिफोरखौ सोलाय-सोल’ खालामाजासे थांनाय समाव सरकारनि खुंथाया 1 बोसोर आबुं जालांबाय। अदेबानि, केबिनेटआव फिन गुबुन सासे मन्थ्रिखौ हाजोयारि ओनसोलनिफ्राय थिसन्नायनि थांखि लायो गिबि मन्थ्रि हिमन्त बिस्व’ सर्माआ।
