क’क्राझार, 19 जुन 2022: बिटिआरनि गाहाइ जिल्लाआव गोजोन थासारिखौ नोजोर बोनानै दिनै उफ्रा जिल्ला मेजिस्ट्रेटआ दुलाराय क’क्राझार जिल्ला नाङैनो 144/144-ACR PC, 1973 धारा आयेनखौ फोसावदों।
बे धारानि बिथोन बादियै गेवलां जायगायाव सा 5 एबा बेनिख्रुइ बांसिन थुबुर जानाय, हान्जा सुरनाय, स्ल’गान होनाय, मेल-मिथिं खुंनाय, रेलि, धर्ना, गनायथि गैया लासेनो मेला खुंनाय बायदिखौ होबथानाय जादों। बेनि अनगायैबो सुबुंफोरखौ गारि-मथर सालायनायनि फारसेबो सानै-साथाम गाखोनायखौ होबथानाय जादों। नाथाय बे धारानि बिथोन बादियै मथर साइकेलआव 12 बोसोर गाहायनि गथ’सा, आइजो आरो बैसो गोरा सुबुंफोरखौ लाफानानै सानै गाखोनो रेहाइ होनायजों लोगोसे मेजिस्ट्रेट, पुलिस, सान्थ्रि हान्जानि जवानफोरखौबो बे आयेननिफ्राय रेहाइ होनाय जादों। मख’नो गोनांदि, जिल्लायाव गोजोन थासारि लाखिनायनि असिलायै बे हरखाब आयेननि धाराखौ फोसावनाय जादों। मानोना बेनि थांखिआ समाजनि बेरेखा मावहाबा आरो राजखान्थि दोलो, फरायसा आफाद आरो गुबुन-गुबुन आफादनि सोमावसारनाय हाबाफारिनि जाहोनाव जिल्लानि गेजेराव आयेन-आब्रुथिनि गाज्रि थासारिया नुजाथिनायनि सन्देह’ दं । बे धारानि बिथोनआ दिनै 19 जुन, 2022 निफ्राय जागायजेनबाय आरो उननि समाव बिथोनखौ बोखाराजासिम बे आयेनआ सोलिबाय थागोन ।
