श्रीलंकायाव इमार्जेनसिखौ गनायथि होनो बाथ्रा फोसावदों

गोदान दिल्ली, 7 मे 2022: थांनाय माखासे साननिफ्रायनो रां-खान्थिनि जेंनाजों बुगिनांनाय श्रीलंकायाव थासारिया फिन गाज्रिसिन जाबावदों।सुबुंफोरनि सोमावसारनायखौ नोजोर होनानै हादतगिरि गटाबाया राजपक्षेया हादताव इमार्जेनसिखौ गनायथि होनो बाथ्रा फोसावदों।बेजों लोगोसेनो सरकारा गनायथि गैयालासे लामायाव ओंखारबोनानै हेंथा धर्ना होनायखौबो होबथादों। मखनो गोनांदि श्रीलंकाया 1948 माइथायाव इंराजनिफ्राय उदां जादोंमोन।बेनि उननिफ्रायसो दासो गिबि खेब बेबायदि जेंनाजों मोगा मोगि जानांदों।दावबायनाय बिफाननि सायाव सोनारनानै थाग्रा श्रीलंकाया थांनाय नै बोसोरनिफ्रायनो करना भाइरासनि जेंनानि जाहोनाव रां खान्थिनि जेंनायाव गोग्लैनांदों।थांनाय से दाननिफ्रायनो श्रीलंकायाव जाग्रा लोंग्रा आदार आरो मुलिनि खमी जानायनि आंखालया नुजाथिदों। पेट्रल पाम्पयाबो खालि जादों।सुबुंफोरा बेवहाय थाव बायनो गसंनानै थादों।नाथाय सरकारनाव थाव बायनो रांखान्थियानो गैया।हादतयाव बेबायदि गिदिर रां-खान्थिनि खैफोत नुजाथिनाया श्रीलंकानि 22 कौटि सुबुंफोरनि जिउखौ नरक बानायदों।सरकारखौ रागा जोंनाय सुबुंफोरा थांनाय 1 दाननिफ्रायनो लामायाव ओंखार बोनानै धर्ना होदों।थांनाय सुक्रबाराव फरायसाफोरनि मोनसे हानजाया कलम्बयाव बानायनाय श्रीलंकानि संसदयाव हाबनो नाजायो।जेराव पुलिसफोरा फरायसाफोरनि हानजाखौ होबथानो थाखाय दै सारो आरो टियार गेसखौ गावयो।नाथाय फरायसाफोरा फासयनानै थायाखै,जायनि जाहोनाव पुलिसफोरा फासयनानै थानांदों।