बरपेटा, 6 मे 2022: कंग्रेस दोलोनि बरपेटा बिधान सभा बियाबनि बारग’ एम एल ए आरो जिल्ला कंग्रेसनि आफादगिरि आब्दुर रहिम खानआ दोलोनि प्राइमारि बिबानखौ दिनै नागारबाय। आसाम प्रदेश कंग्रेसनि आफादगिरि भुपेन बरानिसिम गांसे लाइजामखौ दैथायहरनानै आब्दुर रहिम खानआ गावनि कंग्रेस दोलोखौ नागारनाय बाथ्राखौ रोखायै मिथिहोयो। दोलोखौ नागारनाय समाव बारग’ एम एल एआ बुंबावदों, बे समाव कंग्रेस दोलोजों राइजो-राजाफोरा गैलिया।
मखनो गोनांदि, कंग्रेस दोलोखौ नागारनायनि उनाव बारग’ एम एल ए आब्दुर रहिम खानआ मौलाना बद्रुउद्दिन आजलमनि दैदेन्नाय ए आइ इउ डि एफ दोलोयाव हाबफिन्नो हासिगौ होन्ना सुलुंआ फोरमायदों। आब्दुर रहिम खानआ बरपेटा बिधान सभा बियाबनिफ्राय थांनाय 2011 माइथायनि बिसायखथियाव ए आइ इउ डि एफ दोलोनि जानानै बिजाथि महरै गसंदोंमोन।
नाथाय थांनाय 2018 माइथायाव बारग’ गिबि मन्थ्रि तरुन गगैनि नुजाथिनायाव आब्दुर रहिम खानआ कंग्रेस दोलोयाव हाबो। गुबुन फारसेथिं, खाननि दोलो नागारनायनि उनाव कंग्रेस दोलोआ राफिकुल हकखौ बरपेटा जिल्ला कंग्रेस कमिटिनि गोदान आफादगिरि महरै थिसन्नाय जायो।
