गोदान दिल्ली,7 जुन 2022: जम्मु-काश्मीरनि बारामुला जिल्लाआव थांनाय समबारनि मोनाआव रैखाथि सान्थ्रिफोर आरो उतखारिफोरनि गेजेराव गुलि गावलायनाय जायो। बे गुलि गावलायनायाव लस्कर-ए-तैयबानि सासे उतखारिनि जिउया खहा जायो। थैनाय उतखारिखौ पाकिस्तान लाहरनि थागिबि हंजल्ला महरै सिनायथिनो हादों। गावथार जानाय उतखारिनिफ्राय गंसे एके राइफल,गुलि बारुदजों लोगोसे गरबा मेगजिनखौ बोखांनो हादों।
जम्मु-कास्मीर पुलिसनि बायदिब्ला पानिपुरा हाग्राबारिआव उतखारिफोर थाफैनायनि खौरां मोननायाव रैखाथि सान्थ्रिफोरा खना खनला सिग्रोमनाय अभियानखौ जागायजेनदोंमोन। रैखाथि सान्थ्रिफोरा ओनसोलखौ बेंखननायाव उतखारिफोरा बिसोरनि सायाव गुलि गावग्लुंहरो। जायनि फिन जाथाय होनायाव रैखाथि सान्थ्रिफोराबो गुलि गावहर फिनयो।
रैखाथि सान्थ्रिफोरनि बेबायदि अपारेसन खालामनायाव सा 4 उतखारिफोरा हाग्राबारियावनो थाबथाना थादोंमोन।बिसोर साब्रै उतखारिफोरनि गेजेराव साथामा पाकिस्ताननि आरो गुबुन सासेआ जायगानिनो। मोनायाव खोमसिनि मुलाम्फा लानानै पाकिस्ताननि सा 2 आरो जायगानि सासे उतखारिया खारखोमा लांनो हायो। आथिखालाव बिसोर उतखारिफोरखौ नागिरनाया सोलिगासिनो दं। रैखाथि सान्थ्रिफोरा उतखारिफोरखौ फोजोबस्रांनो बे अभियानखौ सालायदों।
मख’नो गोनांदि नै सान सिगां अनन्तनाग जिल्लानि रिशीपरा ओनसोलावबो रैखाथि सान्थ्रिफोर आरो उतखारिफोरनि गेजेराव गुलि गावलायनाय जाथाय जादोंमोन। जेराव निसार खान्डे मुंनि हिज्बुल मुजाहिदीननि उतखारि कामान्डारा गावथारजादोंमोन। बिनिफ्राय गोबां बिबांनि हाथियारखौबो बोखांनो हादोंमोन। कास्मीराव टारगेट किलिंआ गोबांनिफ्राय गोबां जानायनि उनाव रैखाथि सान्थ्रिफोरा उतखारिफोरनि सायाव गोख्रोङै गाग्लोबदों।
