मुम्बाइ, 5 मे 2022: गावनि रोंगौथि एक्टिंजों लोगोसे बलिउडनि फावखुंग्रि कंगना रानाउतआ सम-सम गोबां बेजे-बेजे बाथ्राफोरजोंबो सावराय जादों। बेजों लोगोसेनो फावखुंग्रि कंगना रानाउतआ गावनि मोनसे युनिक फेस्वन सेन्सबो दं, जेराव गावनि हास्तायग्रा सुबुंफोरा गोबां अनसायनायखौबो नुनो मोन्दों। बे खेबावबो कंगनाआ गावनि फेस्वन सेन्सखौ लानानै सुबुंफोरनि नोजोराव महरनि रानि महरै दिन्थिबावदों।
गुबै बाथ्राया बेनोदि, सुपार स्टार सलमान खाननि बिनानाव अर्पिता खान सर्मानि नखराव खुंनाय ईद पार्टीआव गिबि खेब सहैदों फावखुंग्रि कंगना रानाउतआ। बे पार्टीआव कंगनानि मोनफ्रोमबो गान्नाय-जोमनाया सुबुंफोरनि नोजोराव गोग्लैदों आरो सावरायदों। कंगना रानाउतआबो बे पार्टीनि थाखाय गोबां इक्साइटेड। मानोना सलमान खाननि बिनानाव अर्पिता खाननि नखराव खुंनाय ईद पार्टीआव फावखुंग्रि कंगना रानाउतआ आइबरी कालारनि ड्रेस गान्नायजों सासे राजकुमारि बायदि समाइफ्लेनायखौ सुबुंफोरा सोमोनांनाय फोरमायदों। ईद पार्टीआव कंगनानि गान्नाय ड्रेसखौ डिजाइनार गपी बैदनि कालेकसननिफ्राय लानाय जायो। जेराव कंगनानि गान्नाय सुट ड्रेसनि बेसेनआ 48,999 रां होन्नानै मिथिनो मोन्दों । बिनि गान्नाय ड्रेसखौ नोजोर होनानै सुबुंफोरा बुंदों, फावखुंग्रि कंगना रानाउतआ गोबां रां बाहायना गोसो होसारनानै सलमान खाननि बिनानाव अर्पितानि ईद पार्टीयाव बाहागो लादों।
