सुबुंफोरनि आंगोयै बाहायजाग्रा एल पि जि सिलेन्डार गेसनि बेसेनआ 50 रां बारायबावदों

गुवाहाटी, 7 मे 2022: सरकारआ थांदों-फैदों नाथाय राइजो-राजा सुबुंफोरा मुवा-बेसादनि बेसेन बांनायनिफ्राय इसेबो रेहाइ मोनाखै। मानोना बे खेबावबो बारायबावदों सुबुंफोरनि आंगोयै बाहायजाग्रा ड’मिस्टिक एल पि जि सिलेन्डार गेसनि बेसेनआ। मिथिनो मोन्नाय बादिब्ला, नखराव बाहायजाग्रा(ड’मिस्टिक) सिलेन्डार गेसनि बेसेनआ खेबसेयैनो 50 रां बारायबावदों। जाहोनाव, हादरनि गुबुन-गुबुन राज्योफोराव गेसनि बेसेनआ बारायबावनायजों आलादा-आलादा जाहैनायाव राजथावनि दिल्लीयाव 999.50 रां बेसेन जादों। बेनि अनगायैबो थांनाय 1 मे अक्ट’आव फालांगियाव बाहायजाग्रा 19 के.जि. एल पि जि सिलेन्डारनि बेसेनखौ खेबसेयैनो 102.50 रां बारायना होनानै 2355.50 रांसिम जाहैदों। बेजों लोगोसेनो 5 के.जि. सिलेन्डारनि बेसेनआबो 655 रांसिम जाहैबाय। मखनो गोनांदि, रासिया आरो युक्रेननि गेजेराव जानाय दावहानि जाहोनाव मुलुगनां बाजाराव गोथां थावनि बेसेनआ मोनफ्रोम बेरेलायाव बारायनायनि थाखायनो पेट्रल आरो डिजेलनि बेसेनजों लोगोसे एल पि जि गेसनि बेसेनखौबो बारायनो गोनां जादों होन्नानै भारत सरकारनि बिफानआ सुलुङाव फोरमायदों।