गुवाहाटी, 8 सेप्तेम्बर, 2022 : आसामाव थांनाय माखासे साननिफ्रायनो सरकारि मावखगिरिफोरा आयेन बेरेखायै रां लानायनि हेंथायै Directorate Vigilance and Anti Corruption बिफाना सिग्रोमनायखौ लाखिगासिनो दङ । सिग्रोमनायनि गेजेरजों हाबा मावनायनि मुङाव गुस लानानै रां जाख्लनाय सरकारि साख्रि मावखगिरिफोरखौ हमनो हानायखौबो खौरां बिजोंनि गेजेरजों मथिनो मोन्दों । बेबायदिनो फिन खेबसेबाव सं दान्नायनि गेजेरजों दरं जिल्लानि सासे मण्डलखौ गुस आजावनाय समाव जायगायावनो हमनो मोन्नाया सोराङाव फैदों । हमजानाय सुबुंखौ हरि दास सिंहा होन्नानै मिथिनो मोन्नाय जादों । हमजानाय सुबुङा दरं जिल्लानि पाटरिगात रेभिनिउ सार्कलआव मण्डल हिसाबै हाबा मावयो । रिपर्टनि बायदिब्ला हरि दास सिंहाआ पंकस देखा मुंनि सुबुंनिफ्राय हानि नामजारि खालामनायनि मुङाव 18,000 रां गुस आजावदोंमोन । बेयावनो Directorate Vigilance and Anti Corruption नि मोनसे हान्जाया थांनाय बुधबाराव मण्डलखौ गुस आजावबाय थानाय समावनो हमनो हायो । हमजानाय सुबुंखौ पुलिस बिफाना गावसिनि बेंथेयाव लानानै सेबगासिनो दङ होन्ना मिथिनो मोन्दों । बेराफार्सेथिङै, बे बाथ्राखौ ADGP (Law & Order) GP Singh गावनि टुइटारनि गेजेरजों फोरमायनानै होदों ।
मिथिनो मोन्नाय बायदिब्ला थांनाय दानावबो चराइडेउ जिल्लानि सापखाटि रेभेनिउ सार्कलनि हरि प्रसाद दास मुंनि मण्डलखौ हा नामजारि खालामनायनि मुङाव 10,000 रोजां रां दाबिनायनि हमनो हादोंमोन । रायजोनि सिङाव गुस लानाय एबा रां जाख्लनायखौ होबथानो थाखाय गासै रोखोमनि राहाखौ एन्टि करापसन हान्जा आरो पुलिस बिफाना लागासिनो दङ । आसामनि पुलिस बिफाना गुस बिनाय गसरखौ फोरमाय हरनो थाखाय फोनांजाब खालामनो नाम्बारखौबो फोसावनानै होदों । फोनांजाब खालामनायनि थाखाय फोसावनाय नाम्बारा 1800-345-3767 । सोरबाफोर सुबुङा गसर थिसन्नो थाखाय बे नाम्बाराव फोनांजाब खालामनो हागोन होन्नानैबो पुलिस बिफाना मिथि होदों ।
