गुवाहाटी, 3 जुन 2022: गुवाहाटी नोगोरमानि जराबातआव थानाय नर्थ इस्ट केन्सार हस्पिटेल एन्ड रिसार्च इनस्टिटुइटआव देहा फाहामथाय लाबाय थानाय सासे बेरामिआ गावनि जिउखौनो हरखाब फोजोबना लानाय जाथाया साफ्रोमखौबो सोमोनांहोनाय आरो दुखु मोनखांहोदों। देहा फाहामसालिनि सुलुंनिफ्राय मिथिनो मोन्नाय बादिब्ला, नर्थ इस्ट केन्सार देहा फाहामसालिनि 201 नं. खथानि बेरामिआ हरखाब सेलिं फेनआव दौलें लागायनानै जाहोन मिथिया जासे सासे सुबुंआ गावनि आगोमा जिउखौ फोजोबना लायो। सुलुंनि बादिब्ला, हरखाब जिउ फोजोबना लानाय सुबुंखौ लक्षिमपुर जिल्लानि पद्मा चेत्रि होन्नानै मिथिनाय जादों। बे जाथायनि सायाव दासान्दि जराबात पुलिसआ संदान्नायखौ जागायजेन्दों होन्नानै सुलुङा फोरमायदों।