कक्राझार, 27 सेप्टेम्बर: खोला क’क्राझार दखरा दुलाराय बर’ फरायसा आफादनि खुंगा 20थि फुटबल बादायलायनाया दिनै गाहामै जोबलांबाय । क’क्राझार जिल्लानि बर’गेन्द्राबिलनि गेलेग्रा फोथाराव खुंनाय बे फुटबल बादायलायनायनि जोबथा मेसखौ गोबां राइजो-राजा सुबुंफोरनि नायनाय हेफाजाबाव सत’ गेन्द्राबिल आरो मलानदुबि हान्जानि गेजेराव मोगा-मोगि गेलेयो। नाथाय बे गेलेनाय मेसखौ गोख्रोंसिन गेलेनो हानाय सत’ गेन्द्राबिल हान्जाया गासै 6-3 गलनि फारागथियाव मलानदुबि हान्जाखौ गोरलैयैनो फेजेन्नो हायो । मखनो गोनांदि, दखरा एबसुनि बे फुटबल बादायलायनायाव मिरु दुलाराय बर’ फरायसा आफादनि लोगो गाहाइ नेहाथारि दिनेश ब्रह्मआ आलासि महरै बाहागो लाहैयो ।
