गुवाहाटी, 23 जुलाइ, 2022: आथिखालाव सुबुं लांखारनाय जाथाइया फ्राय जाफ्लेबाय थायो । बेबादि समनि गेजेरावनो गुवाहाटि रेलवे पुलिसनि मोनसे बाखनायथाव हाबाफारि । कामाख्या रेलवे जंसननिफ्राय लांखारजानो नागिरनाय सा 4 हिनजावसाफोरखौ रैखा खालामनो हादों रेलवे पुलिसआ ।
रिपर्टनि गेजेरजों मिथिनो मोननाय बादिब्ला, लांखारजानो नागिरनाय सा 4 हिनजावसाफोरा बांलादेशनि थागिबि । बिसोरखौ भारतआव साख्रि होनो होनना थगायनानै लाबोदोंमोन । पुलिसआ बुंथिना होनाय बादिब्ला, बिसोरनिफ्राय गां 4 नंखाय आधार कार्डबो बोखांनो हादों । सासे GRP अफिसारआ बुंथिना होनाय बादिब्ला, सा 4 बांलादेशनि लाइमोन हिन्जावसाफोरखौ रेलवे पुलिसआ रैखा खालामनो हानाया मोनसे गेदेर जाफुंसारनाय ।
नायबिजिरनायनि गेजेरजों सा 4 लाइमोनफोरखौ बांलादेशनि थागिबि होनना मिथिनो मोन्दों आरो बिसोरो त्रिपुरा फारसे थांगासिनो दंमोन ।
