तामुलपुर जिल्ला कुमारिकाता हाग्रा बिफाननि बेन्दोंआव थानाय बेलकुटि गामिनि गंसे न’खरखौ थांनाय हरनि समाव थेर-बेथेरै सिलिंखार खालामलांजोबदों हाग्रानि मैदेर फालोआ । बेलकुटि गामिनि सबिथा बसुमतारीनि न’खरनि इन्जुरखौ बोफायलांजोबनायजों लोगोसेनो माइ-माइरं, जि-जोम गाननाय-जोमनाय,फराय बिजाब, साइकेल गोदानजों लोगोसेनो ओंखाम संनानै जाग्रा थौ, साराय, गाह्रा बायदिखौ थेर-बेथेर खालामलांजोबदों । जायनि थाखाय न’खरनि सुबुंफोरा थानो उन्दुनो ओंखाम संनानै जानो राहा गोथेनानै थानो गोनां जादों । हाग्रानि मैदेरजों आंगो न’खौ सिलिंखार खालामजानाय दुखुथिया न’खरनि फिसाइआबो थांनाय माखासे सान सिगाङावसो थैना थांदोंमोन। थिक बेबायदि समावनो हाग्रानि मैदेरा फालोआ न’खरखौबो सिलिंखार खालामदों। न’खराव 10 थाखोआव फरायगासिनो थानाय फिसाज्ला फैलाव बसुमतारी, मन्जित बसुमतारी 9 थाखो आरो फिसाजो बैराथि बसुमतारीआ 7 थाखोआव फरायगासिनो दं । बिसोरनि फराय बिजाब आरो गान्नाय-जोमनायफोरखौबो थेर-बेथेर, आलाइ-सिलाइ खालामलांजोबदों । बेनिखायनो दुखुथिया न’खरा सरकारनिफ्राय थाबैनो अनसुंथाइ मोननो हास्थायदों ।