गोदान दिल्ली,18 आगस्ट 2022: भारत सरकारा आदिबासीफोर जौगाखांनायनि थाखाय माखासे हाबा फारिखौ मावदों।बेनि फिथायखौ आथिखालाव नुनो मोननाय जादों।
श्रीधन्याआ सासे आदिबासी आयजो।बिनि नखरा केरेला वायनाडनि फिसा गामि पजुथानाआव थायोमोन आरो बिफाआ सासे दिन हाजिरा मावग्रामोन।नखरनि रां-खान्थिआ आंखाल जानायनि जाहोनाव श्रीधन्याआ उन्दैनिफ्रायनो मोजां सुजुग सुबिदाखौ मोननो हायाखैमोन।नखरा बोथिसे जाग्रा आदारनि थाखाय जायगानि बाजाराव बोरला थिर फानयोमोन।
श्रीधन्यानि बिफाया रां-खान्थिखौ खम खामायोमोन।नाथाय थेवब्लाबो बियो फिसाफोर फरायनायखौ
होबथायाखैमोन।श्रीधन्याआ सोलोंथाय लानायाव जेबो जेंना गैयाजासे आवगयलांनो हादों।बियो वायनाडनिफ्रायनो 10थि आरो 12थि थाखोनि सोलोंथायखौ फुरा खालामदों।बेनि उनाव बियो कालिकटनि कझीकटआव सेन्ट जसेफ कलेजनिफ्राय ग्रेजुयेट खालामो आरो कालिकट इउनिर्भासिटिनिफ्राय जुलजिआव एम ए पास खालामो।
सोलोंथाया जोबखांनायनि उनाव बियो UPSC आनजादखौ होनो थियारि खालामो।नाथाय रां-खान्थिनि आंखालनि जाहोनाव बियो UPSC आनजादखौ होनायनि सिगां साख्रि मावयो।साख्रि मावबाय थानाय समाव बियो आइ ए एस बिबानगिरि श्रीराम रावखौ लोगो मोनयो। श्रीराम रावआ बिनो सिबिल सीर्बिस आनजादखौ होनो थुलुंगाखां होयो।
श्रीधन्याआ अनुसुचित जनजाति बिफाननि गेजेरजों होनाय कसिं चेन्टाराव कसिं लायो।बियो सिगाङाव UPSC आनजादखौ होनाय समाव खननै फेल जादोंमोन।नाथाय थेवब्लाबो बियो मिजिंक थिनायखौ नागाराखै। 2018 माइथायाव बियो UPSC आनजादनि प्रीलिम्स आरो मेन्सआव पास जानो हायो। UPSC इन्टारबिउनि समाव नखरा दिल्लीआव थांनो बिनो ट्रेन टिकेटखौ बुकिं खालामनानै होनो हायाखैमोन। लोगोफोरा 40,000 रोजा रांखौ बुथुमनानै बिनो दिल्लीआव थानो आरो IASइन्टारबिउ होनो थाखाय दैथाय हरो।गोबां नाजानायनि गेजेरजों श्रीधन्या UPSC CSE नि आनजादखौ उथ्रिसारनानै AIR 410 रेंकिंखौ मोननो हायो आरो UPSC आनजादाव उथ्रिसारनो हानाय केरेलानि गिबि आदिबासी आयजो जायो।