गुवाहाटी, 27 जुन, 2022: बेराफोर्सेथिं गोबां अखा हानायनि जाहोनाव आसामाव दै बानानि थासारिया रायजो राजाफोरनि गेजेराव गोबां जेंना सोमजिहोनायखौ नुनो मोनगासिनो दङ। गोबां फरायसाफोराबो जेंनाजों गाज्रियै गोहोम गोग्लै जागासिनो दङ। जायमि जाहोनाव सरकारा माखासे खुंनो गोनां आन्जादफोरखौबो दोन्थनो गोनां जादों। नाथाइ, दिनै H.S आन्जादनि फिथाइआ बेबायदि दुखुनि समावबो फरायसाफोरनि गेजेराव रंजाखांनाय लानानै होफैदों। फोसावनानै होनाय आन्जादनि फिथाइ हिसाबै रायजोनि गेजेराव आरिमु आयदायाव गासै 83.48 जौखोन्दो, बिगियान आयदायाव 92.19 जौखोन्दो आरो फालांगि आयदायाव 87.27 जौखोन्दो फरायसाफोरा उथ्रिसारनो हादों।
आरिमु आयदा हिसाबै नायोब्ला जिल्लाफोरनि गेजेराव देमाजि जिल्लायानो बांसिन जाफुंसारनायखौ मोन्नो हादों गासै 94.67 जौखोन्दो फरायसाफोरा उथ्रिसारनो हादों। बे जिल्लानिफ्राय गासै 5,314 फरायसाफोरा आन्जादाव जिरायदोंमोन बेनि गेजेराव 5,031 फरायसाफोरा जाफुंसारनो हादों। सा 968 फरायसाफोरा 1थि, सा 2503 फरायसाफोरा 2थि आरो 1560 फरायसाफोरा 3थि मासिखौ आवग्रिनानै जाफुंसार जानो हादों। नलबारि जिल्लाया बे आयदायाव 2थि मासिखौ मोन्नो हायो गासै 93.54 जौखोन्दो फरायसाफोरा जिल्लानिफ्राय उथ्रिसारनो हायो बेनि गेजेराव सा 1393 फरायसाफोरा 1थि, सा 2245 फरायसाफोरा 2थि आरो 1702 फरायसाफोरा 3थि मासिखौ आवग्रिनानै उथ्रिसारनो हायो। लक्षिम्पुर जिल्लाया जिल्ला हिसाबै आरिमु आयदायाव 3थि मासिखौ आवग्रिनो हायो। गासै 92.99 जौखोन्दो फरायसाफोरा उथ्रिसारनो हायो। बेनि गेजेराव सा 1575 फरायसाफोरा 1थि मासि, सा 3268 फरायसाफोरा 2थि मासि आरो सा 2516 फरायसाफोरा 3थि मासि लानानै जाफुंसारनो हायो।
फालांगि आयदा हिसाबै जिल्लाफोरनि गेजेराव माजुलिआ 100 जौखोन्दो फरायसाफोरा उथ्रिसारनो हानानै 1थि माथिखौ आवग्रिनो हायो। बे जिल्लानिफ्राय सा 28 फरायसाफोरा आनजादखौ लिरदोंमोन बेनि गेजेराव सा 4 फरायसाया 1 थि मासि, सा 13 फरायसाया 2थि मासि आरो सा 11 फरायसाया 3थि मासिखौ लानानै जाफुंसारो। नैथिआव खोला सालमारा जिल्लाया 96.77 जौखोन्दो उथ्रिसारनो हानानै मासिखौ आवग्रिनो हायो। बेनि गेजेराव सा 22 फरायसाफोरा 1थि, सा 5 फरायसाफोरा 2थि आरो सा 3 फरायसाफोरा थामथि मासियाव उथ्रिसारनो हायो। बेराफारसेथिं, बाक्सा जिल्लाया थामथि मासिखौ जिल्ला हिसाबै आवग्रिनानै लानो हायो। गासै 96.53 जौखोन्दो फरायसाफोरा उथ्रिसारनो हायो। बेनि गेजेराव सा 113 फरायसाफोरा सेथि, सा 98 फरायसाफोरा नैथि आरो सा 39 फरायसाफोरा थामथि मासिखौ मोन्नो हायो।
बिगियान आयदा हिसाबै बि.टि.आर नि सिङाव थानाय बाक्सा जिल्लाया जिल्ला हिसाबै सेथि मासिखौ आवग्रिनो हायो। गासै 98.27 जौखोन्दो फरायसाफोरा बे आयदायाव उथ्रिसारनो हायो। गासै सा 695 फरायसाफोरा आन्जादखौ लिरदोंमोन बेनि गेजेराव सा 536 फरायसाफोरा सेथि, सा 141 फरायसाफोरा नैथि आरो सा 6 फरायसाफोरा थामथि मासि लानानै उथ्रिसारनो हायो। नैथि मासिखौ नलबारि जिल्लाया मोन्नो हायो। गासै 97.99 जौखोन्दो फरायसाफोरा उथ्रिसारनो हायो। बेनि गेजेराव सा 824 फरायसाफोरा सेथि, सा 285 फरायसाफोरा नैथि, आरो सा 11 फरायसाफोरा थामथि मासिखौ मोन्नो हायो। बेराफारसेथिं सिबसागर जिल्लाया बिगियान आयदायाव 97.83 जौखोन्दो मोन्नो हानानै थामथि मासिखौ आवग्रिनो हायो। बेनि गेजेराव सा 884 फरायसाफोरा सेथि 235 फरायसाफोरा नैथि आरो सा 9 फरायसाफोरा थामथि मासिखौ मोन्नो हायो।
