गोदान दिल्ली, 4 जुन 2022: ब्रिटेइननि महारानि एलिजाबेथ नैथिनि खुंथाय खुंनाया 70 बोसोर फुरा जानायाव गाजा गोमजायै प्लेटिनाम जुबलि फोरबो खुंनाय जादों। बे हाबा फारिनि गेजेरजों गंसे सनानि रथखौ ब्रिटेइननि लामायाव खारहोब्ला बयबो सुबुंफोरा गोमोदों। बे सनानि रथआ 260 बोसोर गोजाम।
1953 माइथायाव राजकुमारि एलिजाबेथआ राजउलापात सामलायनो समाय खिरा लानो थाखाय बे रथजोंनो बकिंघाम पेलेसनिफ्राय वेस्टमिंस्टार एब्बेसिम थांदोंमोन। बे रथनि मुङां Gold State Coach आरो रबिबाराव बे रथखौ लनदनआव प्लेटिनाम जुबलि पेरेडआव दिन्थिनाय जागोन।
इंग्लेन्डनि राजउलापातखौ महारानि एलिजाबेथ नैथिनि सामलायनाया 70 बोसोर फुरा जानायाव ,बिखौ सनमान होनायनि मुङाव माखासे हाबा फारिखौ खुंनाय जादों। महारानिनि प्लेटिनाम जुबलि फोरबोनि खाबुयाव ब्रै साननि हाबा फारिनि नैथि सानाव गोजोन हामलायथि बाउनाय हाबा फारि खुंनाय जादों।
बे हाबा फारिनि गेजेरजों महारानिनि सनानि रथखौ 20 बोसोरनि उनाव लामायाव खारहोनाय जादों। बे सनानि रथनि लिरथाया 4 टन।बेयो 7 मिटार गोलाव आरो 3.6 मिटार गोजौ ।बेखौ मा 8 गरायजों सालायनाय जायो। बे रथखौ किं जर्ज थामथिनि बास्तु बोसोनगिरि सार उइलियाम चेम्बार्सआ डिजाइन खालाम होनायाव सेमुअल बटलारआ बेखौ बानायदोंमोन।
दिनै प्लेटिनाम जुबलि फोरबोनि थामथि सान। बे सानाव इउ.के.नि बयनिख्रुइबो देरसिन गिरजा घरनि धन्टाआ हाबा फारि जोबखांनायनि उनाव 4 घन्टा थाद’यालासे गाबबाय थागोन।प्रिन्स अफ वेल्स,डजेस अफ कार्नवाल आरो डयुक एन्ड डचेस अफ केम्ब्रिजजों लोगोसे गागि रयेल्सफोराबो बेवहाय बाहागो लागोन। जेराव प्रिन्स चार्ल्सआ मावख’यारि महरै महारानि एलिजाबेथनि हाबा फारिखौ दैदेनगोन।
2 बोसोर सिगां ब्रिटेइनखौ नागाराखांनायनि उनाव प्रिन्स हेरि आरो मेगननि बेयो गिबि शाही हाबा फारि। महारानि एलिजाबेथ नैथिआ बे हाबा फारिखौ मख’जाथाव खालामनायाव हेफाजाब होनाय सुबुंफोर आरो आलासिफोरनो गाहाम हामलायथि जासिहरदों।
मख’नो गोनांदि महारानि एलिजाबेथ नैथिआ 96 बोसोरनि जाबाय। बेखौ सरासनस्रा हाबा फारियाव खम नुनो मोननाय जायो। एलिजाबेथआ राजउलापातनि बिबानखौ सामलायब्ला 25 बोसोर जाबायमोन। बियो बे राजउलापातनि बिबानखौ गोबाव समसिम सामलायनाय मुंदांखा सुबुं जाबाय।
