बिटिआराव 3थि आरो 4थि खोलोबनि सोरखारि साख्रि फोसावथाइखौ होगोन : प्रमद बर’ ।
3 रोजानिबो बांसिन बिपिएफ दोलोनि सोद्रोमाफोरा इउपिपिएल दोलोयाव हाबफैदों ।
इउपिपिएल राजखान्थियारि दोलोनि सायाव बिटिआरनि रायजो राजाफोरा फोथायनाय दं । मोनफ्रोमबो हारि माहारिनि जौगालु खामानि मावलांनो खोथा होनानै खुंथाइ गोहोयाव फैनाय जथाइ सोरखारा आथिखालाव गोख्रों खामानि मावगासिनो दं । जायनि थाखाय बिपिएफनि 3 रोजानिबो बांसिन सोद्रोमाफोरा मुसलपुर बियाब इउपिपिएल दोलोयाव जयेन जाफैदों । बे गेदेरथार जयनिं हाबाफारियाव बिटिआरनि गाहाइ मावफुंगिरि प्रमद बर’या बाहागो लानानै मोनफ्रोमबो हारि माहारिनि खामानि मावलांनायजों लोगोसेनो गोदानै रेसन काड बानायनो थांखि लानाय आरो अरुणडय आस’नि बागै मिथिहोदों बेजों लोगोसेनो बिटिआराव 3थि आरो 4थि खोलोबनि साख्रिनि थाखाय थाबैनो फोसावथाइ होसिगोन होनना बुंदों ।
मावफुं सोद्रोमा राकेश ब्रह्मनि मददजों खुंफुंजानाय बे जयनिं हाबाफारियावनो बाहागो लानानै बिथांया बुंथियोदि गासैनिबो समान मोन्थाइ आरो गासैनिबो समान जौगानाय मोन्थोरजों बिटिआर हालामाव अरायबो गोख्रों खामानि मावलांगोन । बिटिआरनि मोन 40 बियाबफोरनि गेजेराव 24 नं मुसलपुर बियाबखौ जौगाखांसिननाय दाफुंनो बाथ्रा होदों आरो जायफोरा जयनिं जाफैबाय बिथांमोनखौ लोगोयाव लाफानानै खामानि मावलांगोन होननाबो बुंथियो । बेजों लोगोसेनो बिटिआर हालामाव गोदानै 1 लाकनिबो बांसिन सुबुंफोरनो रेसन काड बानायफुंनानै होनो थाखाय बाथ्रा होनायजों लोगोसेनो फरायसाफोरनो गियान सोरां बिथांखिनि गेजेरजों अनसुंथाइ होबाय थानाय, जिब जुनार फिसिनाय बिथांखिजों रायजोफोरखौ मदद खालामनाय आरो अरुणडय बिथांखिखौ गोदानै होबावनो थांखि लानाय बाथ्राखौ फोरमायथिदों मावफुं सोद्रोमा राकेश ब्रह्मया ।
