तेजपुर, 8 आगष्ट, 2022: आथिखालाव खायसे सुबुंफोरा रां आरजिनायनि गोरलै राहा नागिरो । रांनि थाखायनो सुबुंआ मावनाङै हाबाफोरखौबो मावो । रां आरजिनो गोरलै लामा नागिरनानै सुबुंफोरा आयेननि बेरेखा हाबाफोरखौबो मावो । बेबादिनो मोनसे जाथाइ नुजाथिदों आसामनि सनितपुर जिल्लायाव । TRAFFIC POLICE जाफ्लानानै सरासनस्रा सुबुंफोरनिफ्राय रां लुथियोमोन सासे सुबुंआ । नंखाय TRAFFIC POLICE आ गुबै बिबानगिरिफोरखौ गारिनिफ्राय लाखिनानै नेमखान्थिनि बेरेखायै जुरिमाना फोनांनो नाजादोंमोन । रिपर्टनि बादिब्ला, बै सुबुंआ गुवाहाटीनिफ्राय बासजों फैनानै तेजपुरनि पारुवा चारियालिआव सुबुंफोरखौ चेकिं खालामोमोन आरो बिसोरनिफ्राय गोसो बायदि रां लायोमोन । बिबानाव थानाय पुलिसनि सेनियर बिबानगिरिफोरा जाथाइथिलिआव सहैनानै जाथाइया सोरांआव फैदों । लोगो-लोगोनो बै नंखाय TRAFFIC POLICE खौ हमनानै लादों । नायबिजिरनायनि गेजेरजों आरोबाव मिथिनो मोननाय जादोंदि, बै सुबुंआ रङिया आरो नगावआवबो बे एखे खायदाजोंनो सुबुंफोरनिफ्राय रां लुथियोमोन ।
