बड’लेण्ड सोमावसारनायनि गिबि मुंख्लं सुजित नार्जारीनि आंगोनि बिफा मंगलसिं नार्जारी (74) आ थांनाय 28 नभेम्बर 2022 खालि फुंबिलिनि 6:00 रिंगायाव बातिपारायाव थानाय गावनि आंगो न’आवनो हर्खाबै प्रेसार ष्ट्रकनि गाग्लोबनायजों गोब्राबै नोरजिया जानाङो जायनि थाखाय बिथांखौ बङाइगावनि लवार आसाम देहाफाहामसालियाव मोजां फाहामथायनि थाखाय थिसननाय जायो।
नाथाय जोबोद दुखुनांथाव बाथ्रादि, बिथाङा फाहामथाय लाबाय थानाय समावनो 30 नभेम्बर 2022 एबा मैया मोनाबिलिनि 8:30 रिंगायाव अरायनि थाखाय बे बुहुमखौ नागारनानै रुंसारि जालाङो।
बिनिखायनो बिथांखौ दिनै जोबथा बिदाय होनो थाखाय बिटिआर नि गाहाइ मावफुं सोद्रोमा मुस्रि प्रमद बर’, मावफुं सोद्रोमा मुस्रि रन्जित बसुमतारी, 30 नं सान्जा क’क्राझार बिधान सभा बियाबनि एम एल ए मुस्रि लरेन्स इस्लारी, दुलाराय बर’ फरायसा आफादनि लेङाइ आफादगिरि मुस्रि खोरोमदाव अवारीजों लोगोसेनो बर’नि गोबां मेलेमजिबि, सानसुमै आरो राइजो-राजा बिथांमोनहा दुखुथिया न’खराव थांनानै दुखुनि बाहागोदारि जाहैफायो आरो रुंसारि बिथांखौ जोबथा बिदाय होयो।
