बिटिआर हालामनि हा मोनथाइनि थाखाय “मिसन बैसोमुथि” बेखेवबाय।
बाक्सा, 24 जुलाइ 2022: हानि फोरमान बिलाइफोरखौ न’आव थानानैनो गोरलैयैनो मोननो हानाय बादियै बिटिआर सोरखारा फोसावबाय “मिसन बैसोमुथि” । फैगौ बोसोरनि जानुवारी दाननिफ्रायनो “मिसन बैसोमुथि” एप्सनि गेजेरजों मावखुलियाव थांङालासे न’आव थानानैनो अनलाइननि गेजेरजों हानि फोरमान बिलाइफोरखौ गोरलैयैनो मोननो हासिगोन । बे बाथ्राखौ बिटिआरनि गाहाइ मावफुंगिरि प्रमद बर’या फोरमायथियो । बेजों लोगोसेनो गाहाइ मावफुंगिरि प्रमद बर’या बुंथिबावयोदि ट्राइब्रेल बेल्ट एन्ड ब्लक ओन्सोलाव ट्राइब्रेल नंङै गुबुन हारिनो हानि मोन्थाइखौ होनाय जाया बेयो भारतनि संबिजितावनो लिरखानाय दं बेखौ लानानै साननांगौ गैया । ट्राइब्रेल बेल्ट एण्ड ब्लकनि चेपतार 10 आव लिरनाय बादियै आदीबासी, गोर्खा आरो कच राजबंसि बे मोन्थाम हारिखौ प्रटेक्ट थाखोयाव लिरनाय दं बेनि अनगायै गुबुन हारिनो हानि मोनथाइखौ होनाय जाया ।
खुंथाइ गोहोनि सोरखारा हाखौ रैखाथि होनायनि थाखाय गोख्रों खामानि मावगोन होनना बिटिआरनि गाहाइ मावफुं सोद्रोमा प्रमद बर’या बुंथियो । बेजों लोगोसेनो टाइ, आहम, मरान, मटक, कच राजबंसि आरो आदीबासी बे मोन 6 हारिनो ट्राइब्रेल मर्जादा होनो सावरायनो नागिरनायनि सायाव बिटिआरनि गाहाइ मावफुंगिरि प्रमद बर’या बुंथियो संबिजिताव जाय लिरनाय दं बेखौसो होनो हागोन । संबिजिताव ट्राइब्रेल होनो हानायनि मर्जादा एबा मोन्थाइ गैयाब्ला बेखौ माब्लाबाबो ट्राइब्रेलनि मर्जादा होनो हाया । सोरखारा बे मोन 6 हारिनो ट्राइब्रेल होयोब्ला गोजौ बिजिरसालियाव गसर थिसनब्ला बेनि सायाव बिजिरसालिया थि खालामगोन आरो सोरखाराबो बेनि सायाव सावरायनाय जागोन होनना बुंथिदों । “मिसन बैसोमुथि” बेखेवनाय बिटिआरनि आखान्थि मावफुं सोद्रोमा गबिन्द’ बसुमतारी, मावफुं सोद्रोमा रन्जित बसुमतारी, रेव रेवा नार्जिहारि, दावबायसा बर’, अरुप कुमार दे, राकेश ब्रह्म, घनश्याम दास, एम सि एल ए बिजितगोरा नार्जारि बिथांमोनजों लोगोसेनो बिटिआरनि मोनबा जिल्लानि दिंखनारि अपिसार, लेण्ड रिभिउणुनि गासैबो मावख’गिरि, बिबानगिरिफोरा बाहागो लायो ।
