द्रौपदी मुर्मुआ 15थि हादतगिरि मासिनि समाय खिरा लाबाय।

0
113

गोदान दिल्ली,25 जुलाइ 2022: द्रौपदी मुर्मुआ हादतनि 15 थि हादतगिरि महरै समाय खिरा लाबाय।संसद भवननि सेन्ट्रेल हलाव खुंनाय हाबा फारिआव चीफ जास्टिस NV Ramana आ द्रौपदी मुर्मुखौ समाय खिरा लाहोदों।समाय खिरा लानायाव बियो बुंदों भारतनि गासिबो नोगोरारिफोरनि आसा खालामनाय आरो मोनथायनि नेर्सोन बे गोथार संसदनिफ्राय गासिबो हादतनि सुबुंफोरखौ गोसो गोथारै खुलुमहरो।सुबुंफोरनि आंगोथि,फोथायनाय आरो हेफाजाब होनाया गावनि गोदान बिबानखौ मावफुंनायाव गोहो होगोन।
द्रौपदी मुर्मुआ बुंदों भारतनि गोजौसिन मासिआव सायखनायनि थाखाय गासिबो एमपिफोर आरो बिधान सभानि सोद्रोमाफोरखौ खुलुमहरो।नोंथामोननि भट होनाया कौटि कौटि नोगोरारिफोरनि फोथायनायखौ फोरमायनाय।

गावखौ हादतगिरि महरै आजादी की अम़ृत महत्सब फालिनाय समाव सायखदों।फैगौ 15 आगष्टआव भारतआ उदांस्रिनि 75थि बोसोरखौ फालिगोन।जेब्ला हादतआ उंदांस्रीनि 50थि बोसोरखौ फालिदोंमोन अब्ला गाव राजखान्थिआव गिबि आगान खोख्लैजेनदोंमोन।

भारतआ फैगौ 25 बोसोराव माखासे थांखि लानायखौ जाफुंसार होनो गोसो गोथौयै नाजादों।हादतगिरिनि बिबान मोननाया गावनि थाखाय भाग्य गोनां।गाव हादतनि गिबि हादतगिरि जाय अदांस्रि भारताव जोनोम जादों।

द्रौपदी मुर्मुआ बुंबावदों भारत उदांस्रिनि दावहारुफोरा उदांस्रि भारतनि नोगोरारिफोरनि जेरैबादि सिमां नुदोंमोन,बिसोरनि सिमां नुनायखौ जाफुंसार होनो गोख्रैयै हाबा मावनाय जागोन।फैगौ 25 बोसोराव बयबो नाजानाय आरो बयनिबो बिबान,बे मोननै थांखिजों आवगय लांनांगोन।
फैगौ 26 जुलाइआव कारगिल बिजय दिबसखौ फालिनाय जागोन।बे सानआ भारतनि सानथ्रिफोरनि जोहोलाव आखु दिन्थिनाय आरो धैज्य हमनायनि नेरसोन।दिनै हादतनि सान्थ्रिफोर आरो गासिबो नोगोरारिफोरनो कारगिल बिजय दिबसनि सिगांग्रो गाहाम हामलायथि जासिहरो।

LEAVE A REPLY

Please enter your comment!
Please enter your name here