बनसु दैदेनगिरिफोरनि हेंथायै बाक्सा जिल्ला एबसुनि खौरांगिरि मेल ।
सुबुं खान्थि हादोराव सोमावसारनो गासैहाबो मोन्थाइ दं नाथाय सोमावसारनो मोनथाइ दं होनना बनसुनि दैदेनगिरिफोरा दुलाराय बर’ फरायसा आफाद आरो आथिखालनि एबसुनि आफादगिरि दिपेन बर’खौ दिल्लीयाव मुरदाबाद स्लगान होनायखौ गोख्रों रावजों सोंखारिदों बाक्सा जिल्ला एबसुया । बनसुनि सोमावसारनायाव बाहागो लानानै सानसुमा खुंगुर बैसोमुथियारि, दावराव देख्रेब नार्जारि बिथांमोनहा एबसुखौ दाय होनाय आरो गावसोरनि पारमिसनखौ एबसुया होनो होयाखै होनना बुंनाया गनायथाव नंङा । जुदि बिथांमोनहा पारमिसन दंयोब्ला दिन्थिथों आरो एबसुया गावसोरनि सोमावसारनायखौ होबथादों होनना फोरमान होथों । जुदि फोरमान होनो हायाब्ला बेफोरबादि सोंखारिनायनिफ्राय जानगाराव थानो खावलायदों बाक्सा जिल्ला एबसुया । बनसुनि दैदेनगिरिफोरा आथिखालनि लाइमोनफोरखौ सोमावसारनायनि मुंङाव आलाइ सिलाय आरो माबा मोनसे खहा जाहोयोब्ला बेनि दायनिगिरिया बनसुनि दैदेनगिरिफोरा लानांगौ, बेनि दाइखौ सानसुमा खुंगुर बैसोमुथियारि आरो दावराव देख्रेब नार्जारिया लानांगोन होनना सोंखारियो । दुलाराय बर’ फरायसा आफादा बड’लेण्ड सोमावसारनायनि माब्लाबाबो हेंथा नंङा नाथाय एबसुनि सायाव गासैबो दायफोरखौनो जाबसिननानै होनायखौ गनायनानै लानाय नंङा बेनि थाखायनो जिल्ला आफाद आरो दख’रा आफादफोरा गोख्रों रावजों सोंखारिदों । बर’ हारिखौ गावस्राहोनो नाजाग्रा आरो हारिनि गेजेराव दावराव दावसि लाबोग्रा सुबुंफोरानो जाबाय सानसुमा खुंगुर बैसोमुथियारि आरो दावराव देख्रेब नार्जारि बिथांमोनहा हारिनि गेजेराव खौसेथि जानायखौ माब्लाबाबो लाबोया बेनिखायनो गोदान गोदान बायदि आफाद दानानै गावस्राहोबाय थायो बेनिखायनो बेफोरबादि मानसिनिफ्राय जोंनि रायजोफोरा सांग्रांथि थानो नांगौ होननाबो खावलायो बाक्सा जिल्ला एबसुनि आफादगिरि उमेस दैमारिया । दुलाराय बर’ फरायसा आफादा बड’फानि सिमांखौ जाफुंहोनो गोख्रों खामानि मावगासिनो आरो उननि समावबो मावलांगोन होननानै खौरांगिरि मेलनि गेजेरजों रोखायै फोरमायथियो ।
