गोदान दिल्ली,14 जुन 2022: रासिया आऱो इउक्रेननि दावहा जानाया 111 सान जाबाय। दावहा जानायाव मोननैबो हादतआ गोबां खहा जादों। नाथाय दावहानि समाव माखासे सुबुंफोरा जोहोलाव जानानै नुजाथिदों। बेबायदिनि इउक्रेननि 15 बोसोरनि एन्ड्रि पक्रासा आरो बेनि बिफा स्टानिस्लावआ दावहानि समाव हादतनि थाखाय जोहोलाव आखु दिन्थिदों।
इउक्रेननि राजथावनि किभनि बायजो ओनसोलाव थाग्रा बिसोर सानै बिफा आरो फिसाज्लानि जराआ रासिया सान्थ्रिनि थांलाय-फैलाय खालामनाय टेंकफोरखौ सं दाननो थाखाय मोनसे फिसा ड्रनखौ बाहायदों आरो बेनि डेटा बुथुमनानै इउक्रेननि सान्थ्रिनो दैथाय हरदों।
बिफा फिसाज्लानि जरानि मददजों इउक्रेनआ माखासे मिसनखौ जाफुंसार होदों। एन्ड्रीआ रासिया सान्थ्रिनि इउक्रेनयाव गिबि गाग्लोबजेननायखौ गोसोखांनानै बुंदो, गावनि थाखाय बेयो बयनिख्रुइबो गिख्रंथावसिन सानमोन। गावसोर इउक्रेननि सान्थ्रिनो सुथुरफोरनि फट’ आरो बिसोरनि लकेसननि सोमोनदै खौरांखौ होदों। बेजों बिसोरो सुथुरफोरनि सायाव गाग्लोबनायाव हेफाजाब मोनदों।
एन्ड्रीनि बिफा स्टानिस्लावआ बुंदों गाव ड्रन सालायनाय हाबा फारियावल’ फिसाज्लाखौ मदद खालामो। फिसाज्ला एन्ड्रीयासो ड्रनखौ अपारेट खालामो। एन्ड्रीया बुंबावदों जेब्ला रासियानि सान्थ्रिया किभनि सोनाबयारि बाहागोआव थानाय गावनि गामियाव सौहैयो अब्ला ड्रननि मददजों सुथुर सान्थ्रिनि खौरां बुथुमनायखौ जागायजेनयो। खौरांखौ बुथुमनानै इउक्रेननि सानथ्रिनो दैथायहरदों,जायजों रासिया सान्थ्रिनि गासै मोन 20 था टेंकआ खहा जायो।
गासैबो रादाबखौ फरायनानै मोजां मोननाय
साबायखर बडलेन्द रादाब।