केरेला, 29 जुलाइ 2022: लकडाउननि समाव न’आवनो जिराय-जिराय मा खालामगोन, मा मागोन सुबुंफोरा मोनसे थासारिजों बुगिनांनायखौ नुनो मोन्दोंमोन। नाथाय खायसे सुबुंफोरा थांनाय लकडाउननि समाव न’आवनो गाव-गावनि रोंगौथिजों गोबां बेसादफोर सोरजिनानै लानायखौबो मिथिनो मोन्दों। बेनि मोनसे गिदिर बिदिन्थिखौ फोरमान होदों सासे भारतीय नोगोरारिआ। भारतनि केरेला राज्योनि अशक थामाराक्षन मुंनि सासे रोंगौथि गोनां सुबुंआ थांनाय लकडाउननि समाव गावनि न’आवनो गंसे बिरखंखौ बानायफुंनानै आबुं महर होनो हानायनि थाखाय मुलुगनि गोबां बिथिंनिफ्राय बाखनायदों।
सानै गथ’नि बिफा अशक थामाराक्षनआ लकडाउननि समाव ओरैनो थायालासै गावनि रोंगौथिजों गंसे रैखाथि गोनां बिरखंखौ बानायनानै आबुं महर होनो हानायाव जाफुंसारदों। दासान्दि UK नि एसेक्सनि बिलेरिकेआव थानाय 38 बोसोर बैसोनि अशक थामाराक्षनआ गासै 1,40,000 इउर’ धोन बाहायनानै बिरखंखौ गासै 1500 घन्टानि गेजेरावनो बिरखंखौ बानायफुंनो हायो। जोबोद बाखनायथाव बाथ्रादि, गावनो बानायनाय बिरखंजों दासान्दि अशक थामाराक्षनआ गावनि नखरनि बिसि-फिसाखौ लानानै इउर’प हादराव गिदिंगासिनो दं। सुलुंनिफ्राय मिथिनो मोन्नाय बादिब्ला, केरेलानि अशक थामाराक्षनआ सासे रोंगौथि गोनां पाइलट आरो थांनाय 2 बोसोरसिमनि गेजेराव गावनो गंसे गिदिर गेरेज फसंनानै बे बिरखंखौ बानायफुंदों। बाथ्रायाव दं, नाजानाय थायोब्ला थांखिनि फिथायखौ जेरैखिजाया मोनफुंनो हायो। बेबायदिनो बिथांआ गावनि बे गिदिर जाफुंसारनायखौ गोबां नाजानाय आरो खस्ट खालामनायनि गेजेरजों मोगथाङाव महर होनो हादों होन्नानै सुलुङाव फोरमायदों।
