गुवाहाटी, 26 जुन, 2022: मोनसे दुखुनांथाव जाथाय । गुजरातआव गंसे खारबाय थानाय ट्रेननिफ्राय गोग्लैनानै आसामनि सासे लाइमोनआ जिउ खहा जादों । जिउ खहा जानाय सुबुंखौ कामरुप जिल्ला, शुवालकुशी नोगोरनि भातीपारा गामिनि थागिबि प्रानजल मेधी होननानै सिनायनो हादों । थैनाय सुबुंनि नख’रनि सोद्रोफोरा बुंथिना होनाय बादिब्ला, मेधीआ 22 जुनखालि गंसे प्राइभेट कम्पानीआव खामानि मावनो थाखाय न’खौ नागारनानै गुजरात फारसे आगान होलांदोंमोन । नाथाय बेबादि जाथाय जानायखौ नख’रनि सोद्रोमाफोरा फोथायनो हायाखै ।
पुलिसआ बुंथिनाय बादिब्ला, गख्रै खारथाइयाव खारबाय थानाय ट्रेननिफ्राय गोग्लैनानै लाइमोनआ जिउ खहा जायो । जाथाइ जाखांनायनि उनाव खौरां मोननाय लोगो लोगोनो आहमदाबाद पुलिसनि नागिरनायाव बे सुबुंनि गोथै सह’खौ मोननो हायो । अदेबानि दा गोथै सह’आ आहमदाबाद पुलिस स्टेसनआव दं । बे जाथाइनि फारसे पुलिसआ मेधिनि नख’रनो खौरां हरदों आरो दा नख’रनि सुबुंफोरा बिनि गोथै सह’खौ आहमदाबादनिफ्राय शुवालकुशीसिम लाबोनो थियारि खालामबाय ।
