अरुनाचल, 19 आगष्ट, 2022: अरुणाचल प्रदेशनि सुबनसिरि जिल्लायाव नुजाथिदों मोनसे मुगैथाव जाथाइ । गोबाव समनिफ्रायनो सुबनसिरि जिल्लानि KENDRIYA VIDYALAYA नि गाहाइ फोरोंगिरिआ फरायसुलिफोरनि सायाव गाज्रि आखु दिन्थिबोबाय थादों । फरायसालिनि सा 9 फरायसुलिफोरखौ गाहाय फोरोंगिरि गाज्रि नोजोरजों नायबोबाय थादोंमोन । मिथिनो मोननाय बादिब्ला, बियो थाखो खथायाव क्लास लानाय समावनो फरायसुलिफोरनि प्राइभेट पार्टफोरावबो आखाइ होयोमोन । जेब्ला, फरायसुलिफोरा जाथाइखौ दिथागिरिफोरनो फोरमायो अब्ला बे जाथाइया सोरांआव फैदों । फरायसाफोरनि दिथागिरिनि अजद होनायाव दापरजी पुलिसआ गाहाइ फोरोंगिरिनि सायाव सेक्सन 354 IPC R/W 7 POCSO Act नि जोहै केस थिसनो । हमजानाय गाहाइ फोरोंगिरिनि मुंखौ आखिलेश्वर सिं होननानै मिथिनो मोन्दों । रिपर्टनि गेजेरजों मिथिनो मोननाय बादिब्ला, फरायसालिनि गुबुन सासे फोरोंगिरिनि थिननायनि उनाव फरायसाफोरनि दिथागिरिफोरा गाहाइ फोरोंगिरिनि सायाव अजद होदों । दिथागिरिफोरा बे दायनिगिरि फोरोंगिरिखौ हाजासे साजा होनो थाखाय दाबि दैखांदों ।
